Búgin Májilistiń jalpy otyrysynda Úkimet pen Joǵary aýditorlyq palatanyń 2025 jylǵy respýblikalyq biýdjettiń atqarylýy týraly esepteri qaraldy. Otyrys barysynda depýtat Naýryz Sailaýbai QR Premer-Ministriniń orynbasary – Ulttyq ekonomika ministri Serik Jumanǵaringe memlekettik qaryzdyń ósýine qatysty suraq qoidy, dep habarlaidy ult.kz.
Depýtat Joǵary aýditorlyq palatanyń qorytyndysynda qaryz esebinen ómir súrý modeliniń qalyptasqany atap ótilgenin aityp, memleket tartqan nesielerdiń edáýir bóligi burynǵy qaryzdardy qaita qarjylandyrýǵa jumsalyp jatqanyn jetkizdi.
Foto: parlam.kz
«2025 jyly memleket tartqan nesielerdiń 51 paiyzy qoldanystaǵy boryshtardy qaita qarjylandyrýǵa baǵyttalǵan. Eger bul úrdis jalǵasa berse, 2028 jylǵa qarai biýdjet shyǵystarynyń eleýli bóligi tek qaryzdardy óteýge jumsalýy múmkin degen boljam bar. Úkimet mundai qarjylyq táýekelderdiń aldyn alý úshin qandai naqty sharalar qabyldap jatyr jáne qaryzǵa táýeldilikten shyǵýdyń strategiiasy bar ma?» – dep surady depýtat.
Óz kezeginde Serik Jumanǵarin memlekettik qarjyny basqarýdyń 2030 jylǵa deiingi tujyrymdamasy ázirlengenin atap ótti.
Foto: primeminister.kz
«Bizde memlekettik qarjyny 2030 jylǵa deiin basqarýǵa arnalǵan arnaiy tujyrymdama bar. Onyń negizi – fiskaldyq konsolidatsiia. Bul, birinshiden, shyǵystardy qysqartý, ekinshiden, kiristerdi arttyrý degen sóz. Sonyń nátijesinde memlekettik borysh kólemi de azaiady», – dedi ministr.
Onyń aitýynsha, bir qaryzdy ekinshisimen qaita qarjylandyrý halyqaralyq tájiribede keńinen qoldanylady.
«Sońǵy jyldary Qazaqstannyń halyqaralyq kredittik reitingteri jaqsaryp keledi. Sonyń arqasynda biz qarjyny burynǵydan da tiimdi sharttarmen tarta alamyz. Mysaly, Panda Bond aiasynda tartylǵan qarajattyń mólsherlemesi shamamen 1,9 paiyz boldy. Sondyqtan biz qymbat qaryzdardy arzan qarjymen almastyryp, boryshtyq júktemeni ońtailandyrýǵa tyrysamyz», – dedi Jumanǵarin.
Ministrdiń málimetinshe, atalǵan tujyrymdamaǵa sáikes biýdjet tapshylyǵyn kezeń-kezeńimen tómendetý kózdelgen.
«Qazirgi tańda biýdjet tapshylyǵy jalpy ishki ónimniń shamamen 2,5 paiyzyn quraidy. Ony kelesi jyly 1,7 paiyzǵa, al 2028 jyly 0,9 paiyzǵa deiin qysqartý josparlanyp otyr», – dedi ol.
