QR Bilim jáne ǵylym vitse-ministri Sholpan Karinova jańa oqýlyqtarmen qamtamasyz etý tártibin túsindirdi, dep habarlaidy "Ult aqparat".
Ortalyq kommýnikatsiialar qyzmetindegi baspasóz máslihatynda «Álippe» oqýlyǵyn jańartýǵa qatysty qansha qarajat bólingendigi jáne qai baspada basylyp shyǵatyndyǵy suraldy.
«Birinshiden, oqýlyq shyǵarýǵa memleket tarapynan qarajat jumsalmaidy. Óitkeni qazirgi kezde jalpy oqýlyq jasaý baǵyty básekelestik ortaǵa berilgen. Qazirgi kelip túsip jatqan oqýlyqtardyń barlyǵy shamamen 15 baspadan jiberiledi. «Álippege» bailanysty jasalyp jatqan jobalar bar. Sondyqtan bul turǵyda Úkimet qarajaty jumsalmaidy», - dedi Sh. Karinova.
Sonymen qatar ol oqýlyq satyp alý máselesine toqtaldy.
«Bul bólek jaǵdai. Oqýlyq daiyndalyp bolǵannan keiin, iaǵni shyǵarylǵan soń, oqýlyqty tańdaý kezinde árbir jergilikti atqarýshy organnyń kóleminde belgilenetin josparly túrde qarajat bar. Ol bes jylda oqýlyqtardyń jańartylýyna qarastyrylady jáne ózgergen baǵdarlamaǵa bailanysty bolady. Osy oraida tiisti qarajat bekitilip, jergilikti organdarda eskeriledi. Bul - únemi júrgiziletin jumys, sondai-aq «Álippe» oqýlyǵyna bailanysty jańartylady. Aldaǵy oqý jylynda «Álippeni» satyp alý jumysyn josparǵa sai jergilikti ákimdikter, bilim basqarmalary júrgizedi», - dedi vitse-ministr.
Budan buryn habarlanǵandai, «Álippeni» engizý 2021-2022 jylǵa josparlanǵan.
Biyl tamyz aiynda QR Bilim jáne ǵylym ministri Ashat Aimaǵambetov ózgeristiń aiasynda mektep baǵdarlamasyna sáikes, 1-synyptarǵa 1-2 toqsan «Álippe», 3-4 toqsan «Ana tili» engiziletinin aitqan edi.
