Belgili ázilkesh Qanat Áljapparov kontsert barysynda jubaiynyń Tursynbek Qabatovqa qatysty aitqan eskertýin kópshilikke jariia etti. Óner iesi otbasyndaǵy áńgimeni ázilge ainaldyryp, kórermenderdi kúlkige bóledi, dep habarlaidy ult.kz.
Qanat Áljapparov sahnada áriptesi Tursynbek Qabatovty ónerdegi ǵana emes, ómirdegi de ustazy sanaitynyn aityp júrgenin jetkizdi. Alaida ázilkeshtiń mundai pikirin jubaiy onsha quptamaityn kórinedi.
Onyń sózinshe, kelinshegi Tursynbekti kásibi turǵyda úlgi tutýyna qarsy emes. Degenmen otbasylyq ómirge qatysty máselelerde kúieýiniń ózge adamnan aqyl suramaǵanyn qalaidy.
"Men árqashan aityp júremin, Tursynbek Qabatov – meniń ónerdegi, ómirdegi ustazym. Osylai desem, kelinshegim: "Ómirdegi dep aitpashy. Ónerdegi ǵana ustazyń bolsyn, ómirde saǵan sabaq bermesin. Ómirde birdeńege miyń jetpei jatsa, men-aq kómektesemin. Eshkimnen aqyl suramashy. Astanaǵa múlde barmashy", – dedi ǵoi", – dep ázildedi Qanat Áljapparov.
Ázilkeshtiń jubaiy aitqan sózdi sahnadan jetkizýi zaldaǵy kórermenderdiń kúlkisin týdyrdy.
Qanat Áljapparov bul oqiǵany ázil retinde baiandaǵanymen, Tursynbek Qabatovtyń shyǵarmashylyq jolyndaǵy ornyn erekshe baǵalaitynyn ańǵartty.
Ázilkeshtiń bul áńgimesi áleýmettik jelide de qyzý talqylanyp, jeli qoldanýshylary túrli qaljyńdarymen bólisti. Kópshilik óner iesiniń tapqyrlyǵyna kúlip, pikir alańyn ázilge toltyrdy. Osylaisha, Qanat Áljapparovtyń sahnadaǵy áńgimesi jelidegi jurttyń da kóńilin kóterdi.
Qanat Áljapparov kim?
Qanat Áljapparov – qazaqstandyq ázilkesh, akter jáne «Jaidarman» oiyndary arqyly tanylǵan óner iesi. Ol shyǵarmashylyq jolyn Qyzylorda qalasynda KVN sahnasynan bastaǵan. Keiin «Bazar joq» ázil-syqaq teatrynyń quramynda óner kórsetip, kópshilikke keńinen tanyla tústi. 2013 jyly atalǵan teatrmen birge jumys isteý úshin Astanaǵa qonys aýdarǵany habarlanǵan. Ázilkesh sahnada otbasylyq ómir men qoǵamdaǵy túrli jaǵdailardy qaljyńǵa ainaldyryp jetkizedi. Qanat Áljapparov Tursynbek Qabatovty ónerdegi ustazy retinde qurmetteitinin birneshe suhbatynda aitqan.
Onyń jubaiy – Nurgúl Qudaibergenova. Ekeýi Qyzylordada stýdenttik jyldary dámhanada tanysqan. Ázilkesh 2020 jyly bergen suhbatynda tórt balasy bar ekenin, olardyń ekeýi ul, ekeýi qyz ekenin málimdegen. Ol otbasyna qatysty ázilderin sahnada aitpas buryn jubaiymen aqyldasatynyn da jetkizgen.
Qanat Áljapparov keiin kino salasynda da baǵyn synap, akterlik qyryn kórsete bastady. Ol 2023 jyly jaryq kórgen "Appaq kelin" filminde ról somdaǵan. Atalǵan týyndyda ata-áje tárbiesine berilgen balalardyń taǵdyryna qatysty áleýmettik másele qozǵalady. Sonymen qatar akter "Hotia by v kino 3" jáne "Gáp" filmderine túsken.
