Белгілі әзілкеш Қанат Әлжаппаров концерт барысында жұбайының Тұрсынбек Қабатовқа қатысты айтқан ескертуін көпшілікке жария етті. Өнер иесі отбасындағы әңгімені әзілге айналдырып, көрермендерді күлкіге бөледі, деп хабарлайды ult.kz.
Қанат Әлжаппаров сахнада әріптесі Тұрсынбек Қабатовты өнердегі ғана емес, өмірдегі де ұстазы санайтынын айтып жүргенін жеткізді. Алайда әзілкештің мұндай пікірін жұбайы онша құптамайтын көрінеді.
Оның сөзінше, келіншегі Тұрсынбекті кәсіби тұрғыда үлгі тұтуына қарсы емес. Дегенмен отбасылық өмірге қатысты мәселелерде күйеуінің өзге адамнан ақыл сұрамағанын қалайды.
"Мен әрқашан айтып жүремін, Тұрсынбек Қабатов – менің өнердегі, өмірдегі ұстазым. Осылай десем, келіншегім: "Өмірдегі деп айтпашы. Өнердегі ғана ұстазың болсын, өмірде саған сабақ бермесін. Өмірде бірдеңеге миың жетпей жатса, мен-ақ көмектесемін. Ешкімнен ақыл сұрамашы. Астанаға мүлде бармашы", – деді ғой", – деп әзілдеді Қанат Әлжаппаров.
Әзілкештің жұбайы айтқан сөзді сахнадан жеткізуі залдағы көрермендердің күлкісін тудырды.
Қанат Әлжаппаров бұл оқиғаны әзіл ретінде баяндағанымен, Тұрсынбек Қабатовтың шығармашылық жолындағы орнын ерекше бағалайтынын аңғартты.
Әзілкештің бұл әңгімесі әлеуметтік желіде де қызу талқыланып, желі қолданушылары түрлі қалжыңдарымен бөлісті. Көпшілік өнер иесінің тапқырлығына күліп, пікір алаңын әзілге толтырды. Осылайша, Қанат Әлжаппаровтың сахнадағы әңгімесі желідегі жұрттың да көңілін көтерді.
Қанат Әлжаппаров кім?
Қанат Әлжаппаров – қазақстандық әзілкеш, актер және «Жайдарман» ойындары арқылы танылған өнер иесі. Ол шығармашылық жолын Қызылорда қаласында КВН сахнасынан бастаған. Кейін «Базар жоқ» әзіл-сықақ театрының құрамында өнер көрсетіп, көпшілікке кеңінен таныла түсті. 2013 жылы аталған театрмен бірге жұмыс істеу үшін Астанаға қоныс аударғаны хабарланған. Әзілкеш сахнада отбасылық өмір мен қоғамдағы түрлі жағдайларды қалжыңға айналдырып жеткізеді. Қанат Әлжаппаров Тұрсынбек Қабатовты өнердегі ұстазы ретінде құрметтейтінін бірнеше сұхбатында айтқан.
Оның жұбайы – Нұргүл Құдайбергенова. Екеуі Қызылордада студенттік жылдары дәмханада танысқан. Әзілкеш 2020 жылы берген сұхбатында төрт баласы бар екенін, олардың екеуі ұл, екеуі қыз екенін мәлімдеген. Ол отбасына қатысты әзілдерін сахнада айтпас бұрын жұбайымен ақылдасатынын да жеткізген.
Қанат Әлжаппаров кейін кино саласында да бағын сынап, актерлік қырын көрсете бастады. Ол 2023 жылы жарық көрген "Аппақ келін" фильмінде рөл сомдаған. Аталған туындыда ата-әже тәрбиесіне берілген балалардың тағдырына қатысты әлеуметтік мәселе қозғалады. Сонымен қатар актер "Хотя бы в кино 3" және "Гәп" фильмдеріне түскен.
