Qazaqstanda zeinetaqy annýiteti sharttaryn jasaý jáne ol boiynsha qyzmet kórsetý qaǵidalary jańartylýda. QR Qarjy naryǵyn retteý jáne damytý agenttigi 2026 jylǵy 28 qyrkúiektegi №131 qaýlysymen zeinetaqy annýitetiniń úlgilik shartyna, saqtandyrý tólemderiniń kestesine jáne shartqa jasalatyn qorytyndy formaǵa ózgerister engizdi, dep habarlaidy Ult.kz.
Qujat 2026 jylǵy 1 qazanda jariialandy jáne alǵashqy resmi jariialanǵan kúnnen keiin kúntizbelik 10 kún ótken soń kúshine enedi.
Ózgerister negizinen shart rásimdeý jáne oǵan qyzmet kórsetý tártibin, bir saqtandyrý uiymynan ekinshisine aýysqan kezdegi ótem aýdarý rásimin, sondai-aq saqtandyrý tólemderiniń jekelegen talaptaryn naqtylaýdy qamtydy.
Kepildi saqtandyrý tólemi
Ózgeristerdiń negizgi bólikteriniń biri – saqtanýshy nemese saqtandyrýshy qaitys bolǵan jaǵdaida kepildi qarajat tóleý tártibi.
Eger saqtanýshy nemese saqtandyrýshy adam qaitys bolsa, shartta kórsetilgen tulǵa, al ondai tulǵa bolmaǵan jaǵdaida muragerler shartta kózdelgen kepildi saqtandyrý somasyn alýǵa quqyly. Bul tólemder saqtanýshynyń nemese saqtandyrǵan adamnyń kózi tirisinde tolyq alynbaǵan nemese múldem alynbaǵan jaǵdaida júzege aspaq.
Tólemdi birjolǵy nemese ai saiynǵy túrde alý múmkindigi qarastyrylǵan. Birjolǵy tólem tańdalǵan jaǵdaida onyń mólsheri saqtandyrý syilyqaqysyn esepteý kezinde qoldanylǵan indeksteý mólsherlemesi men tiimdi jyldyq kiristilik mólsherlemesin eskere otyryp aiqyndalady.
Sondai-aq saqtanýshy nemese saqtandyrǵan adam ai saiynǵy saqtandyrý tólemin alǵash alǵanǵa deiin qaitys bolǵan jaǵdaida qoldanylatyn tártip saqtalady. Mundai jaǵdaida shartta kórsetilgen tulǵa, al ol bolmaǵan kezde muragerler eseptelgen ótelý somasyn belgilengen tártippen birjolǵy tólem túrinde alady.
Jerleýge arnalǵan tólem tártibi naqtylandy
Jańartylǵan redaktsiiada shart boiynsha eki saqtanýdyrýshy bolǵan jaǵdai naqty kórsetilgen.
Saqtanýshy (lar) jáne (nemese) saqtandyrǵan adam (dar) qaitys bolǵan jaǵdaida saqtandyrý uiymy otbasy múshelerine nemese jerleýdi atqarǵan adamǵa jerleýge arnalǵan birjolǵy saqtandyrý tólemin aýdarady. Tólem mólsheri shartta kórsetiledi, biraq árbir saqtandyrýshyǵa sol qarjy jylyndaǵy AEK-tiń 35 eselengen mólsherinen kem bolmaýy tiis.
Osylaisha, úlgilik shartta eki saqtandyrýshysy bar sharttarǵa qatysty osy normany qoldaný tártibi naqtylandy.
Basqa saqtandyrý uiymyna aýysý – biryńǵai tsifrlyq júie arqyly
Ózgerister klienttiń basqa saqtandyrý uiymyna aýysý tártibinde de bar.
Jańa redaktsiia boiynsha, ótelý somasy zeinetaqy annýiteti shartynyń jańa saqtandyrý uiymymen jasalǵany týraly saqtandyrý derekter bazasyn qalyptastyrý jáne júrgizý jónindegi uiymnan málimetter alynǵan kúnnen bastap 10 jumys kúni ishinde jańa saqtandyrý uiymyna aýdarylýy tiis.
Bul rette shart týraly málimetter men qajetti aqparat biryńǵai saqtandyrý derekqoryna (BSDQ) shoǵyrlandyrylady. Shartty jasasý jáne ótelý somasyn aýdarý protsesi BSDQ arqyly saqtandyrý uiymdary arasynda aqparat almasýdyń avtomattandyrylǵan elektrondyq tártibine sai júredi.
Bul – saqtandyrýshynyń saqtandyrý uiymyna barmai-aq qujat tapsyrýyna múmkindik beredi. Ótinish pen qajetti málimetter saqtandyrý uiymdary arasynda elektrondyq túrde beriledi. Osylaisha, ótinish berýden bastap ony basqa uiymǵa jiberý jáne aýdarymdy rásimdeýge deiingi protsess biryńǵai tsifrlandyrylady, qaǵazbastylyqtan ada bolady.
Jeke qarajatty paidalaný tártibi naqtylandy
Saqtandyrý syilyqaqysy jetkiliksiz bolǵan jaǵdaida ózi qarajat salý múmkindigi buryn da bolǵan. Jańa redaktsiia ony engizý tártibin naqtylady.
Eger shart jasasý kezinde nemese qolda bar shartqa ózgerister jáne (nemese) tolyqtyrýlar engizý barysynda saqtandyrý syilyqaqysynyń jetispeitin bóligi úshin jeke qarajat tartylsa, bul qarajat birjoly jáne tolyq salynýy tiis.
Shartta saqtandyrý syilyqaqysyna kózderi de kórsetiledi. Ol: BJZQ-daǵy zeinetaqy jinaqtary, basqa saqtandyrý uiymynan alynǵan ótelý somasy jáne saqtanýshynyń jeke qarajaty.
Shart parametrleri týraly aqparat keńeitiledi
Zeinetaqy annýiteti shartyna jasalatyn qorytyndy forma da jańartyldy. Onda saqtandyrý syilyqaqysynyń mólsheri, BJZQ-dan aýdarylatyn zeinetaqy jinaqtary, basqa saqtandyrý uiymynan alynatyn ótelý somasy, saqtandyrý tólemderiniń merzimi, kepildi tólem kezeńi, tiimdi jyldyq kiris mólsherlemesi, indeksteý mólsherlemesi jáne alǵashqy merzimdi saqtandyrý tóleminiń mólsheri kórsetiledi.
Saqtandyrý tólemderiniń kestesinde merzimdi tólemniń kúni men mólsheri, shartta kózdelgen bolsa, saqtandyrylǵan adam qaitys bolǵan jaǵdaida júzege asyrylatyn birjolǵy tólemniń mólsheri, sondai-aq ótelý somasy jeke kórsetiledi.
Bul sharttyń negizgi parametrleri men kózdelgen tólemderdi neǵurlym qurylymdy túrde usynýǵa múmkindik beredi.
Ne ózgerissiz qalady
Zeinetaqy annýitetiniń negizgi qaǵidaty saqtalady: saqtandyrý uiymy saqtandyrylǵan adamǵa ómir boiy saqtandyrý tólemderin aýdaryp otyrady.
Ártúrli sanattaǵy sharttar boiynsha tólemderdiń merzimdiligi de ózgermeidi. 2018 jylǵy 1 qańtarǵa deiin jasalǵan sharttar boiynsha tólemder ai saiyn, toqsan saiyn, jarty jylda bir ret nemese jyl saiyn júzege asyrylýy múmkin, biraq belgilengen jyldyq tólem kólemi saqtalýy tiis. Al 2018 jylǵy 1 qańtardan bastap jasalǵan sharttar boiynsha tólemder ai saiyn aýdarylady.
Jalpy, jańartylǵan erejeler zeinetaqy annýitetiniń talaptaryn naqtylap, jekelegen rásimderdi retteidi jáne ótelý somasyn bir saqtandyrý uiymynan ekinshisine aýdarý kezinde saqtandyrý uiymdary arasyndaǵy ózara is-qimyldy tsifrlandyrýǵa múmkindik beredi.
Qazaqstanda zeinetaqy annýitetin ómirdi saqtandyrýǵa mamandanǵan uiymdar, onyń ishinde Halyk Life usynady. Baǵdarlamalardyń talaptarymen tanysyp, keńes alý jáne esepteý júrgizý úshin halyklife.kz saityna nemese 7123 nómirine júginýge bolady.
