Qyzylorda oblysynyń Aral qalasynda 9 jastaǵy balanyń ákesiniń kóligin júrgizgeni anyqtaldy, dep habarlaidy ult.kz.
Oblystyq politsiia departamentiniń málimetinshe, politsiia qyzmetkerleri áleýmettik jelilerge monitoring júrgizý kezinde balanyń rólde otyrǵan sáti túsirilgen beinejazbany anyqtaǵan.
Oqiǵa kúndiz Aral kósheleriniń birinde bolǵan. Beinejazbany tekserý barysynda balanyń «Toyota Sienna» markaly avtokólikti basqarǵany belgili boldy.
Tekserý kezinde kóliktiń balanyń ákesine tiesili ekeni anyqtaldy. Nátijesinde ata-anasy balanyń tárbiesi men qaýipsizdigine qatysty mindetterin tiisinshe oryndamaǵany úshin ákimshilik jaýapkershilikke tartylyp, sot sheshimimen aiyppul salyndy.