«Kazakhmys Smelting» JShS Balqash mys balqytý zaýytynda óndiristik ǵimarattardyń shatyryn jańartý jumysy jalǵasýda. 2026 jyldyń basynan beri 21 633 sharshy metr shatyr jabyny jóndeldi. Bul josparlanǵan 27 310 sharshy metr kólemniń 79,2%-y, dep habarlaidy Ult.kz.
Jumys óndiristik infraqurylymdy jańartý baǵdarlamasy aiasynda júrgizilýde. Ol ǵimarattardyń senimdiligin arttyrýǵa, paidalaný merzimin uzartýǵa jáne jumyskerler úshin qaýipsiz eńbek jaǵdaiyn qamtamasyz etýge baǵyttalǵan.
Jumystyń negizgi bóligi mys elektrolizi tsehynyń nysandarynda júrgizilýde. Jóndeý jumysyna 1,14 mlrd teńgeden astam qarjy qarastyrylǵan. Búginge deiin josparlanǵan 12 103,4 sharshy metr shatyr jabynynyń 9 551,4 sharshy metri jańartyldy.
Tsehtyń bas korpýsyndaǵy altynshy aralyqtyń 2 421 sharshy metr jumsaq shatyry jóndeldi. Sonymen qatar metall qurastyrmalar boialyp, aýdany 752 sharshy metr jaryq túsetin fonardyń áinegi aýystyryldy. Bak aralyǵynda 3 624,4 sharshy metr shatyr jóndelip, jańa tereze bloktary ornatyldy.
Jumystyń taǵy bir baǵyty – negizgi korpýstyń shatyryndaǵy nóser sý káriz júiesin aýystyra otyryp, kúrdeli jóndeý júrgizý boldy. Qaita jańǵyrtý barysynda temirbeton plitalar zamanaýi sendvich-panelderge aýystyrylýda. Bul ǵimarattyń kótergish konstrýktsiialaryna túsetin júktemeni azaitýǵa múmkindik beredi.

2026 jylǵa josparlanǵan 3 018 sharshy metr shatyr jabynynyń 2 754 sharshy metri montajdaldy. 2027 jyly taǵy 3 040 sharshy metr shatyr jabynyn jańartý josparlanýda.
Kún saiyn nysandardaǵy jumysqa 50-60-qa jýyq maman jumyldyrylady.
Balqash mys balqytý zaýytynyń shatyryn jańartý – Qazaqmystyń óndiristik infraqurylymdy kútip ustaý jáne jańǵyrtý baǵytyndaǵy júieli jumysynyń bir bóligi. Baǵdarlamany iske asyrý óndiristik nysandardyń senimdiligin arttyrýǵa jáne kásiporynnyń turaqty ári qaýipsiz jumys isteýine jaǵdai jasaýǵa baǵyttalǵan.