Almatydaǵy qurylys dúkenderiniń birinde áriptester arasyndaǵy janjal tóbeleske ulasqan. Áiel áriptesi ózin soqqyǵa jyqqanyn aityp, áleýmettik jelide politsiiaǵa qatysty shaǵymyn jariialady, dep habarlaidy ult.kz.
Jábirlenýshiniń aitýynsha, sport sheberi ataǵy bar áriptesi oǵan kúsh qoldanǵan. Alaida oqiǵadan keiin aryzyn tirkeý jáne sot-meditsinalyq saraptamadan ótý kezinde qiyndyqtarǵa tap bolǵanyn málimdegen.
«Sport sheberi ataǵy bar áriptesim meni uryp-soqty. Ekinshi kún boldy, aryzymdy áli tirkei almai jatyr. Soqqy izderi basylǵansha kútip otyr, saraptamaǵa jibermeidi. Miym shaiqalǵan, kórý qabiletim – minýs 2», – dep jazdy almatylyq turǵyn.
Oqiǵaǵa qatysty Almaty qalalyq Politsiia departamenti de pikir bildirdi. Vedomstvonyń málimetinshe, áriptester arasynda janjal týyndap, er adam áielge kúsh qoldanǵan. Osy derek boiynsha qylmystyq is qozǵalyp, 19 jastaǵy kúdikti ustalǵan. Qazir ol ýaqytsha ustaý izoliatorynda otyr.
Sonymen qatar politsiia oqiǵa ornyndaǵy beinebaqylaý kameralarynyń jazbalaryn zerdelegen. Tekserý barysynda áieldiń de áriptesine soqqy jasaǵany anyqtalǵan. Onyń áreketine de quqyqtyq baǵa berilmek.
«Politsiia qylmystyq isti tirkemedi jáne sot-meditsinalyq saraptama taǵaiyndamady degen taraǵan aqparat shyndyqqa sáikes kelmeidi», – dep málimdedi politsiia.
Qazir tergeý amaldary jalǵasyp jatyr. Quqyq qorǵaý organdary janjaldyń barlyq mán-jaiyn anyqtaýda.