Ózgeris pen jańǵyrý úderisi úzdiksiz júrip jatqan zamanda damý máselesi árbir adam úshin mańyzdy taqyrypqa ainaldy. Adam balasy dúniege belgili bir qabiletpen keletini ras. Alaida sol tabiǵi darynyn qanshalyqty asha alady? Qabiletti shyńdaý úshin qandai qadam jasaý qajet? Osy saýaldarǵa jaýap izdeý – ásirese jas býyn úshin asa ózekti, dep habarlaidy ult.kz.
Búginde keibir jastar mamandyq tańdaýda óz júrek qalaýyna emes, ózgeniń pikirine súienip jatady. Biri ata-anasynyń keńesine júginse, endi biri «suranysqa ie mamandyq» nemese «tabysy joǵary sala» degen túsinikpen sheshim qabyldaidy. Árine, mundai tańdaýdyń ózindik sebepteri bar. Degenmen el bolashaǵy jastardyń qolynda ekenin eskersek, olardyń óz qabiletin tanyp, sanaly túrde tańdaý jasaýy asa mańyzdy. Sebebi qoǵamnyń erteńi – búgingi bilim alyp jatqan jas urpaq.
Osy turǵyda Ál-Farabi atyndaǵy Qazaq Ulttyq ýniversiteti stýdentteri jan-jaqtylyǵymen erekshelenedi. Qai fakýltetti alsaq ta, jastar tek bilimde ǵana emes, ónerde, sportta, qoǵamdyq jumystarda, uiymdastyrýshylyq qabilette de belsendiligin tanytyp keledi. Bul – olardyń oi-órisiniń keńdigin, zaman talabyna beiim ekenin kórsetedi.
Biz bilim alyp júrgen fizika-tehnikalyq fakýltetinde de osyndai qarqyn baiqalady. Qazirgi básekelestik zamanynda bir ǵana mamandyqpen shektelý jetkiliksiz ekeni anyq. Sondyqtan stýdentter negizgi kásibi bilimmen qatar, qosymsha daǵdylardy meńgerýge, shyǵarmashylyq jáne ǵylymi izdenisterge erekshe mán beredi. Kóptegen jastar qoǵamdyq jobalarǵa qatysyp, eriktilik qyzmet atqaryp, kóshbasshylyq qabiletterin damytyp júr.
Ýniversitet qabyrǵasynda ótetin ǵylymi konferentsiialar men seminarlarǵa stýdentterdiń belsendi qatysýy – sonyń aiǵaǵy. Olar tek óz oqý ornynda ǵana emes, qalalyq jáne respýblikalyq deńgeidegi ǵylymi jiyndarda baiandama jasap, júldeli oryndarǵa ie bolyp júr. Bul – izdenis pen tabandylyqtyń nátijesi.
Fakýltet ishindegi ǵylymi úiirmeler de stýdentterdiń bilimin tereńdetýge zor múmkindik beredi. Bos ýaqyttarynda jastar ǵylymi jobalar ázirlep, dóńgelek ústelder uiymdastyryp, jańa ideialar men zamanaýi jańalyqtardy talqylaidy. Osyndai belsendilik olardyń kásibi ári tulǵalyq damýyna serpin berip otyr.
Shynynda da, jastar – elimizdiń erteńi, táýelsizdigimizdiń tiregi, baitaq jerimizdiń qorǵany. Búgingi izdenis pen bilim erteń el abyroiyn asqaqtatatyn úlken jetistikke ainalary sózsiz.
Bizdiń senimimiz berik. Jas býyn armanyn júzege asyryp, Alash eliniń dańqyn biikke kóteredi. Sebebi olardyń júreginde maqsat, sanasynda bilim, boiynda qairat bar.
Ǵylymi fizika mamandyǵynyń 4-kýrs stýdenti:
Týlekova Erkejan
PhD doktor, Teoriialyq jáne iadrolyq fizika kafedrasynyń dotsenti
Taýkenova Aliia Sembekovna
