Atyraýda jumys kezinde elektr togyna túsken «Atyraý-Jaryq» qyzmetkeri aýyr jaraqat alyp, aiaǵy men qolynan aiyrylǵan. Sot jazataiym oqiǵaǵa jumys berýshi tarapynan qaýipsizdik talaptarynyń buzylýy sebep bolǵanyn anyqtady, dep habarlaidy ult.kz.
Atyraý oblysy sottarynyń resmi Telegram-arnasyndaǵy málimet boiynsha, oqiǵa 2025 jylǵy 19 jeltoqsanda bolǵan. Elektr monteri jeli tireginde jumys istep jatqan kezde dispetcher ýchaskege elektr qýatyn qaita qosyp jibergen. Saldarynan jumysshyny tok soǵyp, oǵan aýyr jaraqat kelip, aiaq-qoly ampýtatsiialanǵan.
Arnaiy komissiia bastapqyda jumys berýshiniń kinásin 80 paiyz, al jumysshynyń kinásin 20 paiyz dep belgilegen. Buǵan kelispegen azamat sotqa júgindi.
Sot barysynda dispetcherge brigada jumys istep jatqan jelini ajyratý tapsyrylǵany anyqtaldy. Jeli ajyratylǵany rastalǵannan keiin jumysshylar iske kirisken. Alaida dispetcher ýchaskede jumys júrip jatqanyn umytyp, jeliniń jumysqa qabilettiligin tekserý úshin elektr qýatyn qaita qosqan.
Sonymen qatar jumys berýshi tarapynan jumys barysyn tiisti baqylaý júrgizilmegeni jáne jumysshylar jelide bolǵan kezde kerneýdiń qaita berilýine jol bermeitin qaýipsizdik sharalary tolyq qamtamasyz etilmegeni anyqtaldy.
Sot jumysshynyń ózine tapsyrylǵan mindet sheńberinde, jaýapty mamannyń baqylaýymen áreket etkenin eskerdi. Onyń jazataiym oqiǵaǵa ákelgen qandai da bir áreketi dáleldenbegen.
Nátijesinde sot komissiianyń jumysshy kinásin 20 paiyz dep kórsetken qorytyndysyn negizsiz dep tanyp, jumys berýshiniń kinásin 100 paiyz, al jumysshynyń kinásin 0 paiyz dep belgiledi.
Atyraý oblystyq sotynyń ákimshilik ister jónindegi sot alqasy bul sheshimdi ózgerissiz qaldyrdy. Sot qaýlysy zańdy kúshine endi.
