Oralda úilený toiyndaǵy «tentek káde» joralǵysynyń sońy tóbeleske ulasty. Jelidegi málimetke sai, kúieý jigit jaǵynan kelgen qudalardyń biri ázildi kótere almai, er adamdy uryp jibergen, dep habarlaidy ult.kz.
Oqiǵa toi ústinde bolǵan. Áleýmettik jelide taraǵan aqparatqa qaraǵanda, joralǵy barysynda aitylǵan qaljyńǵa bailanysty eki er adamnyń arasynda janjal týyndaǵan. Artynsha olardyń biri ekinshisine qol jumsaǵan.
Negizinde Batys Qazaqstanǵa tán «tentek káde» – qudalardy jaqyndastyryp, toidyń kóńil-kúiin kóterý maqsatynda jasalatyn ázil-qaljyńy aralas dástúrli joralǵy. Ádette bul káde kezinde qudalardyń biri synalyp, túrli ázilge tap bolady. Alaida qaljyń shekten shyǵyp ketse, mundai jaǵdai túsinispeýshilikke ákelýi múmkin.
Qazir oqiǵanyń naqty mán-jaiy, janjalǵa ne sebep bolǵany jáne taraptardyń áreketine quqyqtyq baǵa berilgen-berilmegeni anyqtalyp jatyr.
