Ulytaý oblysynda esirtkini zańsyz ainalymǵa jetkizýdiń óńiraralyq arnasyna tosqaýyl qoiyldy. Arnaiy operatsiia «Qarasora – 2026» jedel-profilaktikalyq is-sharasy aiasynda júrgizilgen, dep habarlaidy ult.kz.
Ulytaý oblysy politsiia departamentiniń esirtki qylmysyna qarsy is-qimyl basqarmasynyń qyzmetkerleri júrgizgen jedel-izdestirý sharalary barysynda esirtkiniń zańsyz ainalymyna qatysy bar degen kúdikpen óńir turǵyny ustaldy.
Kúdiktiniń turǵylyqty jerin tintý kezinde jalpy salmaǵy 38 keli marihýana tárkilendi. Sonymen qatar qos uńǵyly myltyq pen oq-dáriler tabylǵan.
Aldyn ala málimet boiynsha, esirtki zattary zańsyz ainalymǵa engizý maqsatynda elimizdiń ońtústik óńirlerinen Ulytaý oblysyna jetkizilgen.
– Kúdikti ýaqytsha ustaý izoliatoryna qamaldy. Qazir sotqa deiingi tergeý júrgizilip jatyr. Tergeý barysynda esirtkiniń qaidan alynǵany, tasymaldaý joly jáne qylmysqa qatysy bolýy múmkin ózge de tulǵalar anyqtalady, – dedi Ulytaý oblysy PD bastyǵynyń birinshi orynbasary Erbol Qairbekov.
Politsiia esirtki zattaryn zańsyz jetkizý men ótkizýdiń jolyn kesýge baǵyttalǵan jedel jumystar jalǵasyp jatqanyn habarlady.
