Túrkistan oblysynda Syrdariia ózenine batyp ketken aǵaiyndy eki jigittiń denesi birneshe kúndik izdestirýden keiin tabyldy, dep habarlaidy ult.kz.
Qaiǵyly oqiǵa 22 tamyzda Úshqaiyq aýyldyq okrýgi aýmaǵynda bolǵan. 28 jáne 24 jastaǵy aǵaiyndy jigitter sýǵa túsýge tyiym salynǵan jerde shomylǵan. Sýǵa túsý kezinde inisi batyp bara jatqanda, aǵasy ony qutqarýǵa umtylǵan. Alaida ekeýi de ózenge batyp ketken.
Oqiǵa týraly habar túsken boida qutqarýshylar izdestirý jumystaryn bastaǵan. Operatsiiaǵa 90-ǵa jýyq adam, arnaiy tehnika, júzý quraldary men dron jumyldyryldy.
Oblystyq Tótenshe jaǵdailar departamentiniń málimetinshe, 24 tamyzda 2002 jyly týǵan jigittiń denesi shomylǵan jerden shamamen 6 shaqyrym qashyqtyqtan tabylyp, sýdan shyǵarylǵan.
Al 25 tamyzda izdestirý jumystary barysynda 1998 jyly týǵan aǵasynyń denesi oqiǵa ornynan shamamen 30 shaqyrym jerden tabyldy.
TJD azamattardy sýǵa túsýge tyiym salynǵan oryndarǵa barmaýǵa jáne sýdaǵy qaýipsizdik talaptaryn qatań saqtaýǵa shaqyrdy.
