Almaty oblysynyń Talǵar aýdanynda zorlaý týraly aryzǵa der kezinde áreket etpedi degen kúdikpen tórt politsiia qyzmetkeri qylmystyq jaýapkershilikke tartyldy. Olardyń ekeýine sot úkimi shyqsa, bireýi izdeýde júr, dep habarlaidy ult.kz.
«Vremia» portalynyń málimetinshe, qaiǵyly oqiǵa 2025 jyldyń qyrkúieginde Qyzylqairat aýylynda bolǵan. Er adam tanysynyń 27 jastaǵy aǵasyn atyp óltirip, onyń eki jasar qyzyn alyp ketken. Arnaiy jasaq keiin balany qutqardy, kúdikti ustaldy.
Tergeý barysynda osydan birneshe kún buryn balanyń anasy politsiiaǵa zorlaý týraly aryzdanǵany anyqtaldy. Alaida kúdiktige qatysty tiisti shara qoldanylmaǵan. Tipti áieldiń týystary ony politsiiaǵa jetkizgenimen, aryz tiisti deńgeide tirkelmei, ol bosatylǵan.
2026 jylǵy naýryzda negizgi aiyptalýshy zorlaý, adam óltirý jáne bala urlaý qylmystary boiynsha 25 jylǵa sottaldy. Onyń eki kámeletke tolmaǵan sybailasy toǵyz jyldan bas bostandyǵynan aiyryldy.
Politsiia qyzmetkerlerine qatysty bólek qylmystyq is qozǵaldy. Ýchaskelik inspektor qyzmettik salaqtyq pen jalǵandyq úshin 2,5 jylǵa sottalyp, politsiia ataǵynan aiyryldy. Burynǵy politsiia kapitany Musabai bes jylǵa bas bostandyǵynan aiyrylyp, jábirlenýshige 4,5 million teńge tóleýge mindetteldi.
Al tergeýshi Hamitov 27 shildede qashyp ketken. Ol izdeýge jariialanǵan. Kei derek boiynsha, Túrkiiaǵa ushyp ketken bolýy múmkin.
Tórtinshi politseige qatysty qylmystyq quqyq buzýshylyqty jasyrý faktisi boiynsha is tergelgen. Onyń sottaǵy taǵdyry týraly ázirge aqparat joq.
