Qazaqstan Respýblikasy Ónerkásip jáne qurylys ministri Ersaiyn Naǵaspaev Jambyl oblysynda «EýroHim» kúkirt qyshqyly zaýytyn iske qosý rásimine qatysty, dep habarlaidy ult.kz.
Jańa kásiporynnyń óndiristik qýaty jylyna 800 myń tonna kúkirt qyshqylyn óndirýge jetedi. Bul ónim aýyl sharýashylyǵy, energetika, metallýrgiia, mashina jasaý jáne basqa da salalarda keńinen qoldanylady.
Zaýyttyń ashylýy nátijesinde 330 jańa jumys orny quryldy.Atalǵan óndiris orny jylyna 1 mln tonnaǵa deiin mineraldy tyńaitqyshtar men ónerkásiptik ónim shyǵarýǵa múmkindik beretin joǵary tehnologiialyq himiia klasterin qurýǵa baǵyttalǵan aýqymdy indýstriialyq jobanyń bir bóligi sanalady. «EýroHim» halyqaralyq kompaniiasynyń bul jobaǵa salǵan investitsiiasynyń jalpy kólemi 1 mlrd AQSh dollaryn quraidy.
«Joba Memleket basshysynyń elimizdiń ekonomikalyq derbestigin qamtamasyz etý jáne óńdeý ónerkásibin damytý, ekonomikany ártaraptandyrý boiynsha alǵa qoiǵan strategiialyq mindetterin oryndaýǵa qatysty atqarylyp jatqan jumystardyń bir mysaly. Joǵary tehnologiialyq óndiristerdi iske qosý – eki el arasyndaǵy ónerkásiptik yntymaqtastyq pen strategiialyq áriptestiktiń nyǵaiýynyń jarqyn úlgisi. Joba tolyq qýatyna shyqqan kezde Qazaqstan ekonomikasynyń damýyna eleýli úles qosatynyna senimdimin», – dep atap ótti Ersaiyn Naǵaspaev.
Himiia kesheni jobasynyń úshinshi kezeńi aiasynda búginde tiisti jumystardyń 70 paiyzdan astamy oryndalǵan. Jobany tolyq qýatqa shyǵarý kelesi jyldyń basyna josparlanyp otyr. Barlyq óndiristik jeliler iske qosylǵannan keiin himiia ónerkásibi men agroónerkásip kesheniniń damýyna serpin beredi, sondai-aq 1200 turaqty jumys orny ashylady.
