Qazaqstanda shaǵyn biznes sanatynan orta biznes deńgeiine ótetin kásiporyndarǵa arnalǵan arnaiy qoldaý paketin engizý usynyldy. Bul bastama kásipkerlerdiń qyzmet aiasyn keńeitken kezde memlekettik qoldaýdyń jekelegen túrlerinen aiyrylyp qalmaýyna múmkindik beredi, dep habarlaidy Ult.kz.
Quryltaida Prezident Qasym-Jomart Toqaevtyń 2026 jylǵy 28 qazandaǵy Qazaqstan halqyna Joldaýyn iske asyrý máseleleri boiynsha Ekonomikalyq saiasat, ónerkásip jáne energetika komitetiniń keńeitilgen otyrysy ótip jatyr. Jiynda shaǵyn jáne orta biznesti qoldaý men damytý máseleleri talqylandy, dep jazady Qazaqparat agenttigi.
«Atameken» ulttyq kásipkerler palatasy basqarma tóraǵasynyń orynbasary Aslan Qaliǵazinniń aitýynsha, kásipkerlikti damytýdyń kelesi mańyzdy kezeńi – shaǵyn biznesten orta bizneske ótý.
Onyń pikirinshe, turaqty ári shikizattyq emes ekonomikanyń negizgi tiregine ainalýy tiis kásiporyndar – orta biznes ókilderi. Sebebi olar óndiristik jabdyqtarǵa investitsiia salyp, bilikti mamandarǵa arnalǵan jumys oryndaryn asha alady. Sondai-aq shaǵyn jetkizýshiler men iri óndiris oryndarynyń arasyndaǵy bailanysty nyǵaitady.
Aslan Qaliǵazinniń sózinshe, muny investitsiialyq kórsetkishter de dáleldeidi. Sońǵy bes jylda orta kásiporyndardyń negizgi kapitalǵa salǵan investitsiiasy ataýly mánde 2,6 ese ósken. Atap aitqanda, 2021 jyly 1,13 trln teńge bolsa, 2025 jyly 2,95 trln teńgege jetken.
Osy kezeńde eldegi jalpy investitsiia kólemindegi orta biznestiń úlesi 8,5 paiyzdan 12,6 paiyzǵa deiin artqan.
«Orta kásiporyndar sany az bolǵanyna qaramastan, óndiristi damytýǵa barǵan saiyn kóbirek qarajat salyp jatyr», – dedi ol.
Sonymen qatar shaǵyn jáne orta biznes arasyndaǵy ótpeli kezeńde birqatar kedergi bar. Olardyń qatarynda salyq talaptary, investitsiialyq qarjylandyrýdyń jetkiliksizdigi jáne memlekettik qoldaýdyń keibir túrlerinen aiyrylý qaýpi bar.
Máselen, kásiporynnyń túsimi ósken jaǵdaida ol orta biznes sanatyna aýysýy múmkin. Alaida tabystyń artýy óndiris kóleminiń ulǵaiǵanyn bildirmeidi. Buǵan shikizattyń nemese daiyn ónimniń qymbattaýy da áser etýi múmkin. Sonyń saldarynan kásipker mikro jáne shaǵyn bizneske arnalǵan memlekettik qoldaý sharalarynan aiyrylyp qalý qaýpine tap bolady.
Osy máseleni sheshý úshin «shaǵyn biznesten orta bizneske ótý» kezeńine arnalǵan arnaiy qoldaý paketin qalyptastyrý usynyldy.
«Biz shaǵyn biznesten orta bizneske ótetin kásiporyndarǵa arnalǵan beiimdeý tetigin engizýdi usynamyz. Onyń aiasynda salyqtyq ákimshilendirýdi jeńildetý, buryn maquldanǵan memlekettik kómekti kelisilgen merzimge deiin saqtaý, investitsiialyq kreditter berý jáne óndiristi jańǵyrtýǵa qoldaý kórsetý qarastyrylýy kerek», – dedi Aslan Qaliǵazin.
Budan bólek, «Atameken» ulttyq kásipkerler palatasy shaǵyn jetkizýshiler men iri tapsyrys berýshiler arasyndaǵy adal iskerlik mámilelerge kedergi keltiretin salyqtyq shekteýlerdi alyp tastaý qajet dep sanaidy. Osyǵan bailanysty jeńildetilgen jalpyǵa birdei salyq rejimin engizý usynyldy. Bul júie boiynsha salyq kúrdeli esep júrgizbei-aq jalpy túsim men jalpy shyǵyn arasyndaǵy aiyrmashylyq negizinde eseptelýi múmkin.
Sondai-aq jalpyǵa birdei salyq rejimindegi kásiporyndardyń ońailatylǵan deklaratsiia negizindegi arnaýly salyq rejimin qoldanatyn kompaniialarmen jasaityn mámileleri boiynsha shyǵyndardy shegerýge tyiym salýdy alyp tastaý usynyldy.
Al ońailatylǵan deklaratsiia negizindegi arnaýly salyq rejiminde jumys isteitin kásiporyndardyń B2B (biznes pen biznes arasyndaǵy) operatsiialary úshin 8 paiyzdyq mólsherleme engizip, shekti deńgeidi 300 myń ailyq eseptik kórsetkishke deiin tómendetý usynylyp otyr.
«Memleket kásiporyndardyń ósýine jaǵdai jasaýy kerek. Olardy shaǵyn biznes deńgeiinde qalýǵa májbúrleitin sebepter týǵyzbaýy tiis», – dedi Aslan Qaliǵazin.
