33 jyl mal baǵyp, 100 jylqy urlady dep aiyptalǵan er adamǵa advokat Meiirman Shekeev kómek kórsetpek, dep habarlaidy ult.kz.
Bul týraly advokattyń ózi áleýmettik jelidegi paraqshasynda jazdy.
“Kesheden beri meni osy máselege bailanysty kóp adam belgilep, habarlasyp jatyr. Densaýlyǵyma bailanysty bas kótere almai, eshkimge jaýap bere almadym. Qazir osy iste apelliatsiialyq sotta atany aqtap shyǵyp “erlik kórsetken “advokattar”qarsy bolmasa birlese óndirisime alsamba deimin. Jumyla kótergen júk jeńil. Búgin Rýslan Ótepbai baýyrym oqiǵa ornyna baryp, sol jaqtan naqty aqparat beredi. Odan keiin aldaǵy qadamdardy aqyldasyp, sheshim qabyldaityn bolamyz. Bul jerde aryzdanýshyǵa qatysty QK 419,420 babtarynyń belgileride bar siiaqty”, - dep jazdy ol.
Aita keteiik, Aqtóbe oblystyq soty 60 jastaǵy jylqyshy Rahat Sársenovke qatysty shyǵarylǵan úkimdi qaita qarap, ony sot zalynan bosatty.
Buǵan deiin ol qojalyq iesiniń aryzynan keiin 100 jylqyny jymqyrdy degen aiyppen 7 jylǵa bas bostandyǵynan aiyrylyp, moinyna shamamen 30 million teńge shyǵyn ilingen bolatyn. Alaida apelliatsiialyq sotta usynylǵan qosymsha dálelder nátijesinde bir ǵana jylqynyń joǵalǵany anyqtaldy.
Apelliatsiialyq sot otyrysy emotsiiaǵa toly ótti. Ómiriniń 33 jylyn jylqy baǵýǵa arnaǵan Rahat Sársenov úkim ózgergennen keiin sot zalynan bostandyqqa shyqty. Densaýlyǵy syr bergen azamat sot barysynda sóilei almai, kóz jasyna erik berdi. Onyń insýltten keiin bir qoly men bir aiaǵy tolyq jumys istemei qalǵan, sóileýi de qiyndaǵan.
