Gaza sektoryn 2007 jyldan beri HAMAS basqaryp keldi. Osy ýaqyt ishinde uiym tek qarýly top qana emes, is júzinde búkil aimaqtyń úkimetine ainaldy. Densaýlyq saqtaý, bilim berý, politsiia, memlekettik qyzmet – bári HAMAS qurǵan ákimshilik arqyly basqaryldy.
Iaǵni HAMAS degen kádimgi úkimet dese bolady, Eýropa Odaǵy, AQSh, Kanada, Ulybritaniia, Aýstraliia siiaqty elder ony terroristik dep tanysa, al Resei, Túrkiia, Iran, Qytai olai oilamaidy. Qazaqstan da uiymǵa mundai aidar taqpaǵan.
Biraq endi jaǵdai ózgerýi múmkin. Saýdiialyq Asharq Al-Awsat pen Al Hadath basylymdarynyń málimetinshe, HAMAS óziniń úkimetin taratyp, azamattyq basqarýdy táýelsiz tehnokrattar komitetine berýge daiyndalyp jatyr.
Bul – jai ǵana kadrlyq aýys-túiis emes. Eger bul jospar júzege assa, HAMAS alǵash ret Gazadaǵy kúndelikti memlekettik basqarýdan shettep, bilikti basqa qurylymǵa beredi.
Biraq bir mańyzdy suraq bar. Bul HAMAS bilikten tolyq ketedi degen sóz be? Árine, joq. Áńgime tek azamattyq basqarý týraly bolyp otyr.
Iaǵni mektepter, aýrýhanalar, kommýnaldyq qyzmetter men memlekettik mekemelerdi jańa komitet basqarady. Al HAMAStyń qarýly qanaty men áskeri qurylymy ázirge saqtalady. Jańa komitet shamamen jarty jyl buryn AQSh usynǵan atysty toqtatý bastamasy aiasynda qurylǵan. Ony doktor Áli Shaat basqarady. Onyń quramyna palestinalyq saiasi kúshterdiń ókilderi men táýelsiz mamandar engen.
Eń kúrdeli másele – Gazadaǵy atys. Bul jaǵdai áli de ózgergen joq. Izraildiń ustanymy óte qatań. Premer-ministr Biniamin Netaniahý: "HAMAS qarýyn tastamaiynsha, Gazany qalpyna keltirýge múmkindik bermeimiz", – dedi.
Ol Izrail áskeri Gazadaǵy qaýipsizdik beldeýlerin saqtap qalatynyn da málimdedi. Al HAMAS munymen kelispeidi.
Uiym qarýdan birden bas tartpaitynyn, bul másele kezeń-kezeńimen sheshilýi kerek ekenin aityp otyr. Sonymen birge Izrail áskeriniń Gaza sektorynan tolyq shyǵýyn talap etedi.
Izraillik Kan telearnasynyń habarlaýynsha, HAMAS kelissózderdi ádeii sozyp otyr. Uiymnyń esebinshe, Netaniahý da Izraildegi aldaǵy sailaýǵa bailanysty mańyzdy sheshim qabyldaýǵa asyqpaidy. Sondyqtan eki tarap ta bir-biriniń kelesi qadamyn kútip otyrǵandai.
Taǵy bir kúrdeli másele bar. Qazir HAMAS ákimshiliginde shamamen 50 myń memlekettik qyzmetker jumys isteidi. Eger bilik jańa komitetke ótse, bul adamdardyń taǵdyry ne bolady? Olar jańa ákimshilikke qabyldana ma, álde jumystan shyǵaryla ma? Bul suraqqa ázirge naqty jaýap joq jáne dál osy másele kelissózderdiń eń daýly taqyryptarynyń birine ainalǵan.
Sondyqtan búgingi jańalyqty «HAMAS taratyldy» dep qabyldaýǵa bolmaidy. Durysy – HAMAS Gazadaǵy azamattyq bilikti basqa qurylymǵa berýge daiyn ekenin kórsetip otyr.
