Elbasy nelikten tarihqa den qoiyp, ulttyń ótkenin saralaidy? «Uly dalanyń jeti qyry» maqalasynyń túrki álemindegi oryny qandai? Memleket jáne qoǵam qairatkeri Myrzatai Joldasbekov osy saýaldar tóńireginde jaýap bere kele, Uly dalanyń uly tulǵalaryn ulyqtaý kerektigin aitty, dep habarlaidy QazAqparat tilshisi.
«Jalpy, ózderińiz biletindei, Elbasy qazaq tarihyna burynnan moiyn burǵan edi. Ásirese, oǵan tereń kelgen kezi - kórshi memlekettiń basshysy «Qazaqta memleket bolmaǵan, tarih bolmaǵan» degen sózdi aityp jatqan kezde biz Qazaq handyǵynyń 550 jyldyǵyna daiyndalyp jattyq. Naqty osy 550 jyldyq óte me, ótpei me dep ýaiymdap júrgen kezde Elbasy qasietti Ulytaýdyń eteginde Myńbulaqtyń basynda qazaqpen syrlasyp, teledidarǵa suhbat bergen edi. Sonda talai nárseniń basy ashyldy. Sol joly Qazaq handyǵynyń 550 jyldyǵyn toilaý týraly sheshim qabyldandy», - deidi Myrzatai Joldasbekov Ulttyq kitaphanada ótken jiynda.
Memleket jáne qoǵam qairatkeri sol joly Elbasy «Qazaqtyń eshkimnen uialmaityn tarihy bar» degen sózdi aitqanyn eske aldy.
«Uly dalada jeti túgili jetpis qyry bolýy múmkin. Biraq, Memleket basshysy eń negizgi degen jeti qyryn alyp otyr. Shyntýaityna kelgende Uly dalada oryn alǵan dúnie júzi biletin memleketterdiń, máselen Úisin memleketi, Qańly memleketi, Saq pen Ǵun memleketteri, Túrik qaǵanaty, Deshti Qypshaq, Altyn Orda jáne Qazaq handyǵynyń bári Uly dalada ornaǵan memleketter. Ol handyqtardy shetten kelip eshkim ornatyp bergen joq. Qazaq dalasyndaǵy qasietti eskertkishterdiń bárin de ornatqan bizdiń babalarymyz. Bizdiń babalarymyz eshkimnen kem bolmaǵan. Altyn taqta, altyn saraida otyrǵan, altynnan kiingen. Mundai tarih dúnie júzinde joq», - deidi qoǵam qairatkeri.
Myrzatai Joldasbekov óz sózinde qazaq halqy bodandyq ezginiń saldarynan bárinen de aiyryla jazdaǵanyn tilge tiek etti.
«Barymyzdan, qasietimizden, ulttyq jadymyz ben tarihymyzdan aiyryla jazdadyq. Bodan bolǵan ýaqytta bizdi aqymaq dep eseptedi. Biraq, shyndyǵyna kelgender álemdik mádenietterdi jasaǵan - osy Uly dalany mekendegen halyqtar. Maqalanyń ishinde bárimizdiń kókeiimizden shyqqan taraýlar óte kóp. Solardyń biri - Qazaqstan Túrki áleminiń altyn besigi deidi. Shyǵys Qazaqstanda osy jyly «Altai - Túrki áleminiń altyn besigi» atty konferentsiia ótti. Sol sharada «Halyqty oiatý úshin tarihty oiatý» kerek degen meniń sózim jazylǵan eken. Bizdiń Elbasymyz osyny qolǵa alyp jatyr», - deidi Myrzatai Joldasbekov.
Myrzatai Joldasbekov sózin jalǵastyra kele qazaq tarihyndaǵy tulǵalarǵa erekshe mán berý kerektigin aitty.
«Uly esimderdi ulyqtaǵymyz kelse, meniń oiymsha, Qorqyttyń rýhyn jańǵyrtýymyz kerek. Arystanbek (Muhamediulyna qarata - avt.), Qorqyt osy jerde týǵan, Qorqyt osy jerde jatyr. Búkil ónerin osy qazaq dalasynda - Uly dalaǵa tókken adam. Kósem de jyraý da bolǵan adam. Biz Qorqyttai babamen maqtana bilýimiz kerek. Qorqyt - túrki halyqtarynyń babasy. Qudai qalasa, Qorqyttyń basyna búkil prezidentterdi jinap, túnetip, meimanhanasyn jóndep qoisa bolar edi. Túrkistanda úlken toi jasap, jylyna bir ret naýryzda jiyn jasap otyrsaq, túrki balasynyń basy bir bolady. Osyndai maqala jazǵan, halqynyń qamyn oilaǵan Elbasyna búkil halyqtyń atynan, biz sekildi aǵalardyń atynan myń alǵys», - dedi Myrzatai Joldasbekov.
.jpeg)