Qasym-Jomart Toqaev Pavlodar oblysynyń ákimi Asaiyn Baihanovty qabyldap, óńirdiń áleýmettik-ekonomikalyq damýy jónindegi esebin tyńdady, dep habarlaidy ult.kz.
Kezdesý barysynda oblys ákimi byltyr jáne 2026 jyldyń alǵashqy toqsanyndaǵy negizgi kórsetkishter týraly baiandady. Onyń aitýynsha, Pavlodar oblysyna shamamen 1,3 trillion teńge investitsiia tartylyp, ósim 47 paiyzdy quraǵan. Osylaisha óńir investitsiia kólemi boiynsha eldegi kóshbasshylardyń birine ainalǵan.
Sondai-aq ótken jyly ónerkásip óndirisiniń kólemi 4,1 trillion teńgege jetken. Qazaqstanda óndiriletin kómir men ferroqorytpanyń 58 paiyzy, elektr energiiasynyń 42 paiyzy Pavlodar oblysynyń úlesine tiesili ekeni aityldy.
Aýyl sharýashylyǵy salasynda da ósim baiqalǵan. Ónim kólemi 571,4 milliard teńgege jetip, 9,6 paiyzǵa artqan. Óńirde ylǵal únemdeý tehnologiialary keńinen qoldanylyp, kartop, kúnbaǵys jáne qaraqumyqtan mol ónim alynǵan.
Áleýmettik sala boiynsha óńirde 30 myńnan astam jańa jumys orny ashylyp, qalalarda eki mektep, aýyldarda úsh mektep jáne 30 densaýlyq saqtaý nysany salynǵan. Biyl taǵy eki mektep pen bes iri áleýmettik jobany iske asyrý josparlanyp otyr.
Budan bólek, oblystaǵy barlyq aýyl taza aýyz sýmen qamtylǵany habarlandy. Úsh qaladaǵy qoǵamdyq kólik parki tolyq jańartylyp, jaqsy jaǵdaidaǵy joldardyń úlesi 96 paiyzǵa jetken. Ótken jyly 621 shaqyrym jol men aýyl kósheleri jóndelgen.
Kezdesýde Ertis arqyly ótetin jańa kópir salý, áýejaidyń ushý-qoný jolaǵyn jańǵyrtý, tramvai parkin jańartý jáne úshinshi GRES qurylysy sekildi iri jobalardyń júzege asyrylýy da talqylandy.
Prezident Ekibastuz qalasynyń áýe qatynasyn damytýǵa erekshe nazar aýdaryp, jańa áýejai ashý máselesin jan-jaqty qarastyrýdy tapsyrdy.
– Bul joba óńirdiń kólik-tranzit áleýetin arttyryp, investitsiialyq tartymdylyǵyn kúsheitedi, – dep atap ótti Memleket basshysy.
Sondai-aq Qasym-Jomart Toqaev investitsiia tartý, áleýmettik infraqurylymdy damytý jáne injenerlik-kommýnaldyq júielerdi jańǵyrtý jumystaryn jalǵastyrýdy tapsyrdy.
