«VD Stroy Engineering» kompaniiasynyń basshysy Azamat Úsimbekov ózine qatysty aitylǵan aiyptaýlarǵa alǵash ret pikir bildirip, kompaniianyń prezidenttiń týystarymen bailanysy bar degen qaýesetke jaýap berdi, dep habarlaidy ult.kz ulysmedia-ǵa silteme jasap.
Tilshi Azamat Úsimbekovpen «VD Stroy Engineering» kompaniiasy týraly jariialanymdarymen bailanysty jýrnalist Botagóz Omarovaǵa qarsy qozǵalǵan qylmystyq is týraly jáne biznesmen men jumysshylar arasyndaǵy daý, Prezident týystarymen bailanysyna qatysty qaýeset, jáne milliondaǵan qarajat turatyn jobalar týraly áńgimelesken eken.
Ózin aqtóbelik qurylysshynyń balasymyn dep tanystyrǵan Úsimbekov biznesin osy saladan bastap, Aqtóbede túrli jobalalarǵa at salysqanyn aitady.
«Mektepter men zaýyttar saldyq. Keiin turǵynúiler sala bastadyq. Aqtóbede óte kóp turǵynúi saldyq. Sosyn biznesimiz keńeiip, Atyraý oblysynda, Oral, Aqtaý qalalarynda qurylys júrgizdik», – degen Azamat Úsimbekov memlekettik tenderlermen qatar jeke tapsyrystar da alatyndaryn aitty.
2014 jyldan beri «RG» kompaniiasymen jáne Reseidiń birqatar kompaniialarymen jumys istegenderin jetkizdi.
«Ásirese pandemiia kezinde reseilikter lokdaýn kesirinen kele almaǵan kezde ózimiz montaj jumystaryn, iske qosý-baptaý jumystaryn istep, kóp tájiribe jinadyq», – dedi ol.
Azamat Úsimbekov 2023 jyly tamyzda «VD Stroy Engineering» kompaniiasyn Arman Járkeevten satyp alǵanyn aityp otyr. Degenmen qansha somaǵa alǵanyn «kommertsiialyq qupiia» dep aitpady.
Kompaniia basshysy «Aitpa, Botagóz!» telegram arnasynyń avtory, jýrnalist Botagóz Omarovamen atalǵan kompaniiaǵa qatysty jazba shyqqannan keiin tanysqanyn aitty.
«Shataspasam aqpan aiynda tanystym. Birinshi jazba shyqty, sosyn ekinshisi shyqty, úshinshi jazba shyqqan kezde jýrnalistpen bailanysqa shyqtym. Ol óziniń roliginde sóilegen «biz qaryz» degen jumysshylarmen jeke kezdesý uiymdastyrýdy surady. Sosyn biz kezdesip, sóilestik. Adamdar meni jeke jáne zańdy tulǵa retinde ózderine qaryz emes ekenimdi aitty. Bir qosalqy merdiger men ekinshisi arasynda ózara daý-damai baryn jetkizdi. Biz Botagóz hanymǵa eshkimge qaryz emes ekenimiz týraly barlyq dáleldi kórsettik», – dep otyr Azamat Úsimbekov.
Eske salsaq, buǵan deiin jýrnalist Botagóz Omarova «kórineý jalǵan aqparat taratý» isi boiynsha sot sheshimimen úiqamaqqa alynǵanyn habarlaǵan bolatynbyz. Ol óziniń «Aitpa, Botagóz!» telegram arnasyna jariialaǵan materialdynda «prezidenttiń at qoralary» jaily sóz qozǵalǵan.
Úsimbekovtiń «VD Stroy Engineering»-ti satyp alǵannan keiin alǵan alǵashqy jobasy dál osy daýly bolǵan atqora kórinedi.
Úsimbekovtiń sózinshe qurylys 2023 jyly tamyzda bastalyp, 2024 jyly mamyrda aiaqtalǵan.
«Capital Engineering» qandai da bir jumystarǵa «Remstroi-1» kompaniiasyn tartqan jáne olardyń arasynda qandai da bir sheshilmegen daý bolǵan. Ol daý úsh jylǵa sozylǵan. Biraq biz ol týraly bilmedik. Seriialy jariialymdardan keiin biz olarmen kezdesip, sóilesip máseleni anyqtai bastadyq. Biz bul iste ózara kelisimge kelýleri úshin, kelmese zań aiasynda sheshýleri úshin zańgerlerdi, injenerler usynbaq boldyq. Sebebi olar úshin jalaqy almaǵan jumysshylar zardap shegip jatty.
«Jumsartyp aitpasaq, bul – bopsalaý. 600 mln. teńge osyndai seriialy jariialymdar arqyly almaqshy boldy. Botagóz hanymnyń ózi estidi. Týra maǵynasynda: «Óte qatty keshirim suraimyn» dep aitty. Jáne jazbalardy qalai óshiretinin túsiný úshin bir táýlik oilanatynyna ýáde berdi», – degen «VD Stroy Engineering» kompaniiasy basshysy óziniń eshkimge qaryz emes ekenine Botagóz Omarovanyń kózi jetkenin, biraq soǵan qaramastan jýrnalist jazbalaryn jalǵastyra bergenin aityp otyr.
«Meniń ony sottatý maqsatym joq. Ol muny ádeii istegenin moiyndasa deimin. Eger Botagózdi jańylystyrsa, ol týraly ashyq aitsyn», – deidi Azamat Úsimbekov.
Azamat Úsimbekovtiń biznesin memleket basshysynyń týystarymen bailanystyrý qanshalyqty shyndyqqa janasady? Bul týraly suraqqa jaýap bergen «VD Stroy Engineering» basshysy Prezidentti ómirinde kórmegenin, týystarymen tanys emes ekenin aitty.
«Men ol kisiniń saiasatyn qoldaimyn, biraq ol kisini ómirimde kórmegenmin, aty atalyp jatqan týystaryn da tanymaimyn», – dep otyr ol.
