Qasym-Jomart Toqaev Qyzylorda oblysynyń ákimi Murat Ergeshbaevty qabyldap, óńirdiń áleýmettik-ekonomikalyq damýy jónindegi esebin tyńdady, dep habarlaidy ult.kz.
Kezdesý barysynda oblystyń qańtar-sáýir ailaryndaǵy negizgi makroekonomikalyq kórsetkishteri men aldaǵy damý jospary tanystyryldy.
Ákimniń aitýynsha, Qyzylorda oblysynda investitsiialyq ahýal jaqsaryp, ekonomikany ártaraptandyrý jumystary kúsheigen. Aldaǵy úsh jylda óńirde jalpy quny 1 trillion 900 milliard teńgeni quraityn 48 investitsiialyq jobany iske asyrý josparlanyp otyr. Onyń ishinde biyl 1 trillion teńgege baǵalanǵan 14 iri jobanyń qurylysy bastalady.
Sondai-aq Memleket basshysynyń Ulttyq quryltaida bergen tapsyrmasyna sáikes, Qyzylorda qalasynda 300 oryndyq kópbeiindi aýrýhana, 500 oryndyq emhana, 200 oryndyq perinataldyq ortalyq, jańa drama teatry men zamanaýi kitaphana salynyp jatyr.
Infraqurylym baǵytynda Qyzylorda – Aqtóbe avtojolyn keńeitýdiń alǵashqy kezeńi bastalǵan. Al Beineý – Sekseýil tas jolynyń qurylysy jaqyn ýaqytta qolǵa alynbaq.
Óńirde jyl sońyna deiin taǵy 10 eldi mekendi gazdandyrý josparlanǵan. Nátijesinde halyqtyń 85 paiyzy kógildir otynǵa qol jetkizedi.
Budan bólek, turǵyndardy baspanamen qamtý maqsatynda biyl 2400 páter berý kózdelgen. Sonymen qatar oblysta 138 shaqyrym avtomobil joldary, kósheler men kópir ótkelderin jóndeý josparlanyp otyr. Osylaisha jaqsy jaǵdaidaǵy joldardyń úlesin 95,5 paiyzǵa jetkizý kózdelýde.
Kezdesý sońynda Qasym-Jomart Toqaev oblys ákimine ekonomikany ártaraptandyrý, investitsiia tartý, ekologiialyq jaǵdaidy jaqsartý jáne aýyl sharýashylyǵyna sý únemdeý tehnologiialaryn engizý jumystaryn jalǵastyrýdy tapsyrdy.
