Almaty taýlarynda 73 jastaǵy Ońtústik Koreia azamatyn izdeý jumystary jalǵasyp jatqanda, jýrnalist Mihail Kozachkov týristerdi izdeýge jumsalatyn memlekettik shyǵyndardy óteý máselesin zańnamalyq deńgeide qarastyrýdy usyndy, dep habarlaidy ult.kz.
Jýrnalisttiń sózinshe, memleket qutqarý jumystaryna qymbat tehnika satyp alyp, qutqarýshylarǵa jalaqy tóleidi. Al taýda adasyp ketken týristerdi izdeý úshin ondaǵan adam jumyldyrylyp, arnaiy tehnika, drondar, kinologiialyq toptar men tikushaqtar tartylady.
«Týristerdi izdeýge ketken shyǵyndy zańnamalyq deńgeide qalai óteýge bolatynyn baiyppen oilanýymyz kerek. Memleket qymbat tehnika satyp alady, qutqarýshylarǵa jalaqy tóleidi. Keiin qandai da bir týrist beitanys taýda sýperqaharman bolǵysy kelip, ondaǵan adam ony izdeýge shyǵady. Olar óz ómirlerin qaterge tigip, kúrdeli aýa raiynda jumys isteidi, janarmai men ýaqyt jumsaidy. Bul birtúrli emes pe?» – dep jazdy Mihail Kozachkov.
Qazir Almaty taýlarynda Ońtústik Koreianyń 73 jastaǵy azamaty Cho Kýkhidi izdeý jumystary úshinshi táýlik qatarynan júrip jatyr.
28 qyrkúiekte ol bir top adammen birge «Shymbulaq» aspaly joly arqyly Talǵar asýynyń mańyndaǵy shamamen 3200 metr biiktikke kóterilgen. Keiin er adam baǵytty óz betinshe jalǵastyryp, qalaǵa jalǵyz túsetinin aityp, toptan bólinip ketken.
Alaida ol qonaqúige oralmaǵan. Onyń joǵalǵany týraly aqparat 29 qyrkúiekte 112 qyzmetine túsken. Osydan keiin Tótenshe jaǵdailar ministrligi izdeý-qutqarý jumystaryn bastap, jedel shtab qurdy.
Qazir izdeý jumystaryna shamamen 50 adam, 8 tehnika, 7 dron, 3 kinologiialyq esep jáne «Qazaviaqutqarý» tikushaǵy tartylǵan.
Qutqarýshylar Sol Talǵar aýmaǵyn, Bogdanovich muzdyǵyn, oǵan irgeles shatqaldar men taý soqpaqtaryn jáne basqa da jetýi qiyn ýchaskelerdi tekserip jatyr. Sonymen qatar beinebaqylaý kameralarynyń jazbalary qaralyp, osy aýmaqta bolǵan týristerden suraý júrgizilýde.
Izdeý jumystary táýlik boiy jalǵasyp jatyr.
