Búginde 12 myń politsiia qyzmetkeri tek nysan kúzetip otyr. Bul týraly QR Ishki ister ministri Erlan Turǵymbaev málim etti, dep habarlaidy "Ult aqparat".
Búgin Parlament Senatyndaǵy Úkimet saǵatynda 2019-2021 jyldarǵa arnalǵan ishki ister organdaryn jańǵyrtý boiynsha Jol kartasyn iske asyrý taqyryby talqylandy.
Politsiiany ózine tán emes fýnktsiialardan bosatý máselesine toqtalǵan ministr, «Memlekettik organdardyń jáne zańdy tulǵalardyń 72 kúzet nysany básekelestik ortaǵa berildi. Sporttyq jáne mádeni-kópshilik is-sharalardyń qaýipsizdigin qamtamasyz etýge ishki ister organdary bólinisterin jappai tartý praktikasy qysqartyldy. Endi buqaralyq is-sharalardyń uiymdastyrýshylary jeke kúzet qurylymdarynyń qyzmetkerlerin jáne eriktilerdi tartady», - dedi.
Onyń sózine qaraǵanda, kúzet boiynsha taǵy 662 nysandy (qazynashylyq, salyq qyzmetteri, qoimalar, sottar, prokýratýra) básekelestik ortaǵa berý máselesi pysyqtalýda.
«Búginde 12 myń politsiia qyzmetkeri tek nysan kúzetip otyr. Olarǵa qylmystyń betin ashý , quqyqbuzýshylyqtyń aldyn alý boiynsha jumystar júktelmegen», - dedi Erlan Turǵymbaev.
Onyń aitýynsha, elimizde 5 100 kúzet qurylymy bar, olar Ishki ister ministrligimen litsenziialanǵan. Atalǵan kúzet qurylymdarynyń ishinde tek 2800-i ǵana qyzmet etýde. Osy oraida olarǵa kúzet naryǵynda jumys bolmai tur.
«Bizde mamandandyrylǵan kúzetshiler 98 myńǵa jetti. Olarda kúzet qyzmetine litsenziiasy bar, sondai-aq olarǵa qarý ustaýǵa quqyq berilgen», - dedi vedomstvo basshysy.
