Almatyda segizinshi qabattan qulaǵan 13 jastaǵy jasóspirimniń ómirin dárigerler saqtap qaldy. Shamamen 24 metr biiktikten qulaǵan balanyń jaǵdaiy aýrýhanaǵa jetkizilgen kezde asa aýyr bolǵan, dep habarlaidy ult.kz.
Qalalyq Densaýlyq saqtaý basqarmasynyń málimetinshe, jasóspirimdi jedel járdem brigadasy №1 qalalyq balalar klinikalyq aýrýhanasyna jetkizgen. Dárigerler onyń bas-mi jaraqatyn alǵanyn, miy soǵylǵanyn, qol-aiaǵy birneshe jerden synǵanyn anyqtady. Sonymen qatar keýde jáne qursaq qýysy aǵzalary zaqymdanyp, travmatikalyq shok bolǵan.
Bala birden jansaqtaý bólimine jatqyzyldy. Jaraqattardyń aýqymyn anyqtaý úshin basynan aiaǵyna deiin kompiýterlik tomografiia jasaldy.
Aýrýhananyń reanimatsiia bóliminiń meńgerýshisi Medetali Mákilbekovtiń aitýynsha, dárigerler alǵashqy eki táýlikte jasóspirimniń ómirlik mańyzdy aǵzalarynyń qyzmetin turaqtandyrýǵa kúsh salǵan. Keiin naýqasqa ota jasalyp, úshinshi kúni jansaqtaý bóliminen travmatologiia bólimine aýystyrylǵan.
Jalpy, travmatologtar men reanimatologtardan quralǵan meditsinalyq top tórt ota jasaǵan.
«Segizinshi qabattan qulaý – óte aýyr jaraqat. Balanyń aman qalýynyń ózi úlken jetistik. Bizdiń komanda birden qajetti meditsinalyq kómek kórsetýge kiristi. Jaraqattardyń sipaty men aýyrlyǵyn eskere otyryp, tórt ota jasaý týraly sheshim qabyldandy. Barlyq operatsiia sátti ótti. Qazir naýqastyń jaǵdaiy oń boljam jasaýǵa múmkindik beredi», – dedi aýrýhana direktorynyń orynbasary Qurmetbek Toqtar.
Dárigerlerdiń aitýynsha, jasóspirimge áli de em qabyldap, qalpyna kelý jáne ońaltý sharalarynan ótý qajet.
