Qazaqstan Prezidenti Qasym-Jomart Toqaev pen Grýziianyń Premer-ministri Iraklii Kobahidze resmi delegatsiialar qatysqan keńeitilgen quramdaǵy kelissóz ótkizdi, dep habarlaidy Ult.kz.
Kelissóz barysynda taraptar saiasi, saýda-ekonomikalyq jáne mádeni-gýmanitarlyq yntymaqtastyqty keńeitý perspektivalaryn talqylady.
Qasym-Jomart Toqaev Qazaqstannyń Ońtústik Kavkazdaǵy senimdi seriktesi sanalatyn Grýziiamen dostyq qarym-qatynasty joǵary baǵalaitynyn aitty. Prezidenttiń sózinshe, eki eldi tarihi bailanys, ortaq mádeni qundylyqtar jáne halyqtar arasyndaǵy berik qarym-qatynas biriktiredi.
Memleket basshysy búgin qol qoiylatyn Strategiialyq seriktestik ornatý jónindegi birlesken málimdeme qazaq-grýzin bailanysyn jańa sapaly deńgeige kóteretinine senim bildirdi.
Prezidenttiń aitýynsha, Qazaqstan Grýziia ekonomikasyna 500 million dollardan astam investitsiia quiǵan jáne eldiń iri investorlarynyń biri bolyp otyr. Sondai-aq taraptar Baký – Tbilisi – Djeihan munai qubyry arqyly munai tasymalyn ulǵaitýǵa nietti ekenin rastady.
Óz kezeginde Iraklii Kobahidze Qazaqstandy Ortalyq Aziiadaǵy senimdi seriktes retinde atap ótip, Qasym-Jomart Toqaevtyń basshylyǵymen eldiń turaqty damý jolyna túskenin aitty. Ol Strategiialyq seriktestik týraly birlesken málimdemeniń qabyldanýy eki el arasyndaǵy yntymaqtastyqqa jańa serpin beretinin jetkizdi.
Kezdesý barysynda Memleket basshysy strategiialyq áriptestikti naqty iske asyrý úshin energetika, investitsiia, kólik, aýyl sharýashylyǵy, tsifrlandyrý, týrizm jáne basqa da baǵyttardy qamtityn arnaiy «jol kartasyn» ázirleýdi usyndy.
Taraptar Transkaspii halyqaralyq kólik baǵdary aiasyndaǵy yntymaqtastyqty kúsheitýge de erekshe nazar aýdardy. Atap aitqanda, kólik-logistika infraqurylymyn damytý, konteinerlik tasymal kólemin arttyrý, tarif saiasatyn úilestirý jáne tsifrlandyrý jumystaryn jedeldetý josparlanyp otyr. Sońǵy bes jylda Orta dáliz arqyly júk tasymaly 3,5 ese ósken, al 2029 jylǵa qarai bul baǵyttaǵy konteinerlik poiyzdar sany 3 myńǵa jetedi dep kútilýde.
Sonymen qatar Qazaqstannyń Grýziiadaǵy teńiz porttaryna qatysýyn keńeitý máselesi sóz boldy. Byltyr qazaqstandyq investordyń qatysýymen Poti portynda jańa mýltimodaldi terminal iske qosylsa, Anakliia porty óńiraralyq bailanysty damytýǵa múmkindik beretin mańyzdy jobalardyń biri retinde ataldy.
Kelissózde tsifrlandyrý men jasandy intellekt salasyndaǵy yntymaqtastyqqa da basymdyq berildi. Eki el tsifrlyq úkimet, onlain memlekettik qyzmetter jáne GovTech sheshimderi boiynsha tájiribe almasýǵa daiyn ekenin bildirdi. Sondai-aq Qazaqstan grýziialyq startaptar men tehnologiialyq kompaniialardyń Astana Hub baǵdarlamasyna qatysýyn qoldaitynyn málimdedi.
Budan bólek, densaýlyq saqtaý, bilim berý, mádeniet jáne týrizm salalaryndaǵy áriptestikti nyǵaitý máseleleri qaraldy. Prezident Grýziianyń qazaqstandyq týrister arasynda tanymal baǵyt ekenin atap ótip, Qazaqstan da grýziialyq qonaqtardy qabyldaýǵa daiyn ekenin aitty. Sondai-aq eki eldiń mádeniet kúnderin ótkizýdi usyndy.
