Premer-ministrdiń orynbasary Qanat Bozymbaev Atyraý oblysyna jumys sapary aiasynda «Energetikalyq jáne kommýnaldyq sektorlardy jańǵyrtý» ulttyq jobasy sheńberinde júzege asyrylyp jatqan nysandardy aralap, káriz tazartý qurylystaryn qaita jańǵyrtý, súzgileý stansasyn salý jumystarymen tanysty. Sondai-aq ol azamattyq qorǵaý júiesiniń daiyndyǵyn tekserip, «Aýyl amanaty» jobasy aiasyndaǵy aýyl sharýashylyǵy nysanyna da bardy, dep habarlaidy ult.kz.
Ulttyq joba sheńberinde Atyraý qalasyndaǵy jylý jelileri jańǵyrtylý ústinde. Jeliniń jalpy uzyndyǵy 409,2 shaqyrym bolsa, tozý deńgeii — 62,3%. Jobada tozý deńgeii 95%-ǵa jetken, uzyndyǵy 8 shaqyrymǵa jýyq ýchaskeni rekonstrýktsiialaý kózdelgen. Nátijesinde jylý shyǵynyn 75%-ǵa azaitý josparlanyp otyr. 2030 jyldyń sońyna deiin qalada 26,6 shaqyrym jańa jylý jelisin tartý josparlanǵan. Bul jumystar injenerlik jelilerdiń jalpy fizikalyq tozýyn 40%-ǵa deiin tómendetýge múmkindik beredi.
Óńirde elektr jelileri de jańartylyp jatyr. «Atyraý Jaryq» JShS 110 kV áýe jelileriniń 114,6 shaqyrymyn, 35 kV jelilerdiń 50,7 shaqyrymyn jáne 6/10 kV jelilerdiń 238 shaqyrymyn, sondai-aq 46 transformatorlyq qosalqy stansany jańartýdy kózdeitin 9 is-sharany qolǵa alǵan. Budan bólek, elektr energiiasyn avtomatty esepke alatyn 10,5 myńnan astam qural ornatylyp, 16 qosalqy stansada SCADA júiesi engiziledi. Qurylys-montaj jumystary 2027 jylǵy aqpanda bastalmaq.
Qanat Bozymbaev sapardy qortytyndylap, jaýapty memlekettik organdar men uiymdarǵa kommýnaldyq infraqurylymnyń problemaly nysandaryna qatysty sheshimderdi der kezinde qabyldaýdy, jumystardyń merzimin sozbaýdy jáne jańǵyrtýdyń uzaq merzimdi nátijesine basymdyq berýdi tapsyrdy.
Sondai-aq injenerlik jelilerdi keshendi jańartýǵa, tazartý qurylystarynyń tiimdiligine, sýmen jabdyqtaýdyń senimdiligine jáne óńirdiń sý sharýashylyǵy infraqurylymyn damytýǵa erekshe nazar aýdarýdy júktedi.
