Memleket basshysy jasandy intellektini retteý máselesin qozǵady, dep habarlaidy ult.kz.
Ol Qazaqstanda tsifrlyq transformatsiianyń quqyqtyq negizi qalanǵanyn, «Jasandy intellekt týraly» zań men Tsifrlyq kodeks qabyldanǵanyn eske saldy. Prezidenttiń aitýynsha, bul arada muqiiat oilastyrylǵan institýtsionaldyq teńgerim men táýekelge negizdelgen tásil qajet.
– Atalǵan salany shamadan tys retteýge bolmaidy. Óitkeni áleýeti zor komandalar men ázirlemeler jáne kapital basqa iýrisdiktsiialarǵa ketip qalýy yqtimal. Sondyqtan qarapaiym qaǵidany ustanǵan jón: azamattardyń qaýipsizdigi, quqyqtary men asa mańyzdy múddeleri synǵa túsken jaǵdaida, talaptar qatań bolýǵa tiis, alaida shekten shyqpaǵan durys, – dedi Qasym-Jomart Toqaev.
Memleket basshysy adam kapitalyna airyqsha mán berdi. Prezidenttiń pikirinshe, zamanaýi derekter ortalyǵy, ozyq tehnologiialar ózdiginen eshqandai nátijege kepil bola almaidy. Ǵalymdar, injenerler, kásipkerler bolmasa, tehnologiialyq serpilis jasaý múmkin emes.
– Sondyqtan biz bilimdi, bilikti, jasampaz mamandar daiarlaityn ulttyq ǵylymi-injenerlik mektep qalyptastyrýymyz kerek. Osy oraida, jańadan ashylǵan Qazaq AI Research University-ge airyqsha mindet júkteledi. Bul oqý orny bilim berýmen qatar, óndiris pen ekonomikanyń suranysyna sai ǵylymi zertteýler júrgizýge tiis. Osy maqsatpen jasandy intellektini naqty salalarda qoldanýǵa arnalǵan AI+X modeli qolǵa alynyp otyr. Onyń múmkindigin óndiris, energetika, meditsina, qarjy, memlekettik basqarý júiesinde tiimdi paidalaný kerek. Jalpy, bizge daiyn ónim men jańa tehnologiia jasai alatyn myqty, iaǵni naǵyz bilikti mamandar qajet. Osy tusta eskeretin mańyzdy másele bar. Jasandy intellekt adamnyń intellektýaldyq qabiletin almastyratyn qural emes, oqý jáne bilim alý úderisine kómekshi tásil bolǵany jón. Tehnologiia qarqyndy túrde damyǵan saiyn, bilim alý, syni oilaý, sheshim qabyldaý jáne jaýapkershilikti seziný qasietteri asa ózekti bola túsedi. Bul – aqiqat, – dedi Prezident.
