Qazaqstannyń IT qyzmetteriniń eksporty ótken jyly 1 mlrd dollardan asty. Al otandyq tsifrlyq sheshimder álemniń 100-den astam elinde qoldanylyp jatyr. Bul týraly Prezident Qasym-Jomart Toqaev málimdedi, dep habarlaidy ult.kz Aqordaǵa silteme jasap.
Memleket basshysy Qazaqstannyń tolyqqandy tsifrlyq memleketke ainalý baǵytynda júieli jumystar júrgizip jatqanyn aitty.
«Ótken jyly qazaqstandyq IT qyzmetter eksportynyń kólemi 1 mlrd dollardan asty. Bizdiń tsifrlyq sheshimderimizdi álemniń 100-den astam elinde paidalanady», – dedi Qasym-Jomart Toqaev.
Prezidenttiń aitýynsha, bul jetistikter Qazaqstannyń tehnologiialyq damýǵa umtylysyn kórsetedi. Degenmen, ozyq tehnologiialar salasynda qol jetkizgen nátijelermen toqtap qalýǵa bolmaidy.
Ol innovatsiialyq startap-kompaniialarǵa naqty qoldaý kórsetip, ozyq jobalardy iske asyrý qajettigin atap ótti.
Sonymen qatar Qasym-Jomart Toqaev jasandy intellekt salasynda joǵary jaýapkershilik pen adaldyq qaǵidalaryn saqtaý mańyzdy ekenin aitty.
Prezident AQSh prezidenti Donald Tramptyń bastamasymen amerikalyq jetekshi tehnologiialyq kompaniialar arasynda jasalǵan sýperintellekt jónindegi kelisimge toqtaldy.
«Bul tásil barlyq múddeli elder tarapynan jan-jaqty talqylanǵannan keiin jahandyq deńgeide qabyldaýǵa bolatyn úlgi retinde qarastyrylýy múmkin», – dedi ol.
Memleket basshysy buǵan qosa ekonomikadaǵy naqty suranystarǵa negizdelgen indýstriialyq AI-mindetter tizimin qalyptastyrýdy usyndy.
Osy tizim negizinde qazaqstandyq jáne sheteldik komandalardyń qatysýymen AI Challenge baiqaýyn iske qosý usynyldy. Tiimdiligin dáleldegen úzdik jobalar óndiriste engizilmek.
