Memleket basshysy Qasym-Jomart Toqaev Jasandy intellektini damytý jónindegi keńestiń úshinshi otyrysynda JI tehnologiialaryn qaýipsiz ári jaýapkershilikpen damytý máselesine toqtaldy, dep habarlaidy ult.kz.
Prezident jaqynda AQSh prezidenti Donald Tramp pen iri tehnologiialyq kompaniialardyń basshylary qol qoiǵan jasandy intellektiniń ozyq tehnologiialaryn qaýipsiz ári jaýapkershilikpen damytý jónindegi erikti kelisimniń strategiialyq mańyzyna nazar aýdardy.
Qasym-Jomart Toqaev bul bastamany der kezinde kóterilgen mańyzdy qadam dep baǵalap, jasandy intellektige qatysty qaýip-qaterlerdiń memlekettik shekaraǵa baǵynbaitynyn atap ótti.
«Sondyqtan memleketter men biznes qaýymdastyq tarapynan úilesimdi áreket qajet. Vashingtonda qol qoiylǵan kelisimdi sarapshylar muqiiat zerdelegen soń múddeli memleketter jasandy intellekt salasyn jahandyq deńgeide retteitin úlgi retinde qarastyrýyna bolady», – dedi Prezident.
Memleket basshysy «Vashington modeli» BUU aiasyndaǵy halyqaralyq kelisimge negiz bolýǵa laiyq ekenin aitty.
Sonymen qatar Qazaqstannyń jasandy intellektini qaýipsiz ári jaýapkershilikpen damytý ustanymyn atap ótti.
– Osy oraida, atalǵan másele boiynsha syndarly halyqaralyq dialog júrgizýge alań usyna alamyz. Keńes is júzinde mańyzdy ekenin kórsetti. Sondyqtan Keńes múshelerinen qysqa merzim ishinde Qazaqstannyń osy salaǵa qatysty halyqaralyq bastamasyna naqty usynys berýdi suraimyn, – dedi Qasym-Jomart Toqaev.
Prezident ortaq ustanym biyl jeltoqsanda Maiamide ótetin G20 sammitinde tanystyrylatynyn málimdedi. Qazaqstan Prezidentiniń sammitke qatysýy AQSh tarapynan shaqyrylǵany buǵan deiin habarlanǵan.
