Qazaqstan Prezidenti Qasym-Jomart Toqaev pen Chernogoriia Prezidenti Iakov Milatovich keńeitilgen quramda kelissóz ótkizip, saiasi, saýda-ekonomikalyq jáne mádeni-gýmanitarlyq yntymaqtastyqtyń perspektivalaryn talqylady, dep habarlaidy ult.kz.
Kelissózderge eki eldiń resmi delegatsiia músheleri qatysty. Memleket basshysy Chernogoriiany Qazaqstannyń Balqan túbegindegi senimdi seriktesteriniń biri dep atap, eldiń Eýropa Odaǵyna múshelikke umtylysyn joǵary baǵalady.
«Siz reformalardy ilgeriletip, Eýropa Odaǵy músheligine úmitker sanalatyn Chernogoriianyń pozitsiiasyn nyǵaitýda mańyzdy ról atqaryp kelesiz. Osy ulttyq strategiialyq maqsatqa jetý jolynda tabys tileimiz», – dedi Qasym-Jomart Toqaev.
Prezident Qazaqstannyń Chernogoriiamen seriktestik bailanystardy odan ári jandandyrýǵa múddeli ekenin atap ótti. Onyń aitýynsha, sońǵy jyldary joǵary deńgeidegi saiasi dialog turaqty sipat alyp, ekijaqty yntymaqtastyqtyń damýyna oń yqpal etip keledi.
Memleket basshysy Podgoritsa qalasynda Qazaqstannyń Bas konsýldyǵynyń ashylýy eki el arasyndaǵy bailanysty keńeitýge degen umtylystyń aiqyn kórinisi ekenin aitty. Sonymen qatar Astanada Chernogoriianyń diplomatiialyq missiiasyn ashý jáne parlamentaralyq qatynastardy nyǵaitý mańyzdy ekenin jetkizdi.
Qasym-Jomart Toqaev biznes qaýymdastyq ókilderiniń kezdesýi men eki eldiń saýda palatalary arasynda qol qoiylatyn ózara túsinistik týraly memorandým iskerlik bailanystardyń damýyna serpin beretinine senim bildirdi.
«Qazaqstan naryǵyna kirgisi keletin chernogoriialyq kompaniialardy qýana qarsy alamyz. Kásipkerlerińizge qolaily jaǵdai jasaýǵa daiynbyz», – dedi Prezident.
Óz kezeginde Iakov Milatovich Qazaqstanǵa jasaǵan sapary eki el arasyndaǵy diplomatiialyq qarym-qatynastyń ornaǵanyna 20 jyl tolýymen tuspa-tus kelgenin atap ótti.
Chernogoriia basshysy saýda palatalary arasyndaǵy memorandým ekonomikalyq yntymaqtastyqty jańa deńgeige kóterýge múmkindik beretinin aitty. Sondai-aq onyń sózinshe, Chernogoriia Eýropa Odaǵyna kirý úderisiniń sońǵy kezeńinde tur jáne 2028 jyly uiymnyń tolyqqandy múshesi bolýǵa úmittenedi.
Kezdesý barysynda taraptar ózara saýda kólemin arttyrý, kólik-logistika, aýyl sharýashylyǵy jáne tsifrlandyrý salalaryndaǵy yntymaqtastyqty keńeitý máselelerin qarastyrdy. Sonymen qatar týrizm, joǵary bilim, ǵylym jáne mádeni-gýmanitarlyq bailanystardy damytý jóninde ýaǵdalastyqqa qol jetkizildi.
Osy rette Qasym-Jomart Toqaev Chernogoriia Ulttyq kitaphanasy janynan Abai ortalyǵyn ashýǵa qoldaý kórsetkeni úshin Iakov Milatovichke alǵys bildirdi.
Kelissóz sońynda memleketter basshylary óńirlik jáne jahandyq kún tártibindegi ózekti máseleler boiynsha pikir almasty.
