T.Ábdirashev atyndaǵy Qazaqstan Respýblikasynyń Memlekettik akademiialyq simfoniialyq orkestri 91-shi kontsert maýsymyn Gýstav Malerdiń №2 do minor «Qaita tirilý» simfoniiasymen ashty, dep habarlaidy ult.kz.
Orkestrmen birge B.Baiqadamov atyndaǵy Memlekettik hor kapellasy óner kórsetti. Orkestrge onyń kórkemdik jetekshisi ári bas dirijeri Qanat Omarov jetekshilik etti.
«Qaita tirilý» – álemdik simfoniialyq klassikanyń eń kólemdi ári kúrdeli týyndylarynyń biri. Bes bólimnen turatyn shyǵarmada orkestr, hor men solister úndesip, ómir, úmit pen rýhani jańǵyrý taqyryptary qozǵalady.
Hor partiialary kapellanyń kórkemdik jetekshisi ári bas dirijeri Beiimbet Demeýovtiń jetekshiligimen daiyndaldy.
Aita keteiik, keshe Almatydaǵy Abai atyndaǵy Qazaq ulttyq opera jáne balet teatrynyń 93-teatr maýsymy «Aqbala» ulttyq baletiniń premerasymen ashqan bolatyn. Onda Ábdijámil Nurpeiisovtiń «Qan men ter» roman-epopeiasy alǵash ret balet tilimen sahnalandy.
