1 qyrkúiekte Amerika Qurama Shtattarynyń bastamasy boiynsha BUU Qaýipsizdik Keńesi jappai qyryp-joiý qarýyn taratpaý jáne olardy jetkizý júielerin taratý qaýpi taqyryby boiynsha ministrler deńgeiinde kezdesý ótti.
Basqosýda BUU Qaýipsizdik Keńesiniń qarý-jaraqtyń taratylýyn boldyrmaý týraly sheshimderin qoldaný joldaryn talqylandy, dep habarlaidy QR SIM baspasóz qyzmeti.
AQSh Memlekettik hatshysy Reks Tillerson óziniń aýqymdy baiandamasynda jahandyq qarýsyzdaný men taratpaý úderisindegi Qazaqstannyń róline bólek nazar aýdardy. Atap aitqanda, ol iadrolyq qarýdan bas tartqan elimiz danalyqtyń airyqsha úlgisi bolyp tabylatynyn atap ótti. Qazaqstan burynǵy keńestik qarýlardy jáne iadrolyq tehnologiialardy óz aýmaǵynan alyp tastady jáne iadrolyq emes memleket retinde Iadrolyq qarýdy taratpaý týraly shartqa qosyldy.
«Qazaqstan basshylyǵynyń batyl sheshimi iadrolyq qarýdyń, onyń quramdas bólikteriniń, iadrolyq materialdardyń jáne qos maqsatty tehnologiialardyń ziiankesterdiń qolyna túsý qaýpin edáýir qysqartty», - dep atap ótti R. Tillerson. Onyń pikirinshe, iadrolyq qarý basqa eldermen qarym-qatynastardy qiyndatyp, esepten jańylysý, apattar nemese taratý qaýpin týdyrady.
Memlekettik hatshy Qazaqstannyń áreketi eldi halyqtar qaýymdastyǵyna tartý úderisinde mańyzdy qadam bolǵandyǵyna erekshe toqtaldy. «Iadrolyq qarýdan qutylýdyń nátijesinde álem Qazaqstandy iadrolyq agressorǵa ainalýy múmkin «alastatylǵan» memleket retinde qarastyrmaidy. Ol óziniń iadrolyq kórshileri - Resei men Qytaidyń dushpanyna da ainalǵan joq. Sondai-aq búginde Qazaqstan kórshilerimen tatý-beibit ómir súrýde. Ol berik saýda qatynastaryn damytýda. Biyl EKSPO-2017 halyqaralyq mamandandyrylǵan kórmesi ótip, ol bolashaqtyń energiia kózderin jáne búkil álemniń qatysýshylaryna Qazaqstannyń investitsiialyq múmkindikterin kórsetti. Bul óńirlik jáne halyqaralyq beibitshilik pen órkendeýge eleýli úles qosyp otyrǵan zamanaýi memleket. Qazaqstan óziniń sheshiminen tek paida kórdi», - dedi ol.
«Burynǵy kásibi qyzmetimde Prezident Nursultan Nazarbaevpen birneshe ret kezdestim jáne oǵan osy sheshim týraly suraq qoiýyma múmkindik boldy. Ol maǵan bul sheshimge eshqashan ókinbeitinin jáne kúnderdiń birinde bul joba jas elimiz úshin jasaǵan eń zor jaqsylyǵy ekenin aitqan bolatyn», - dep eske aldy R. Tillerson.
Syrtqy ister ministri Qairat Ábdirahmanov óz sózinde AQSh Memlekettik hatshysyna bizdiń elimizge jáne Prezident N. Nazarbaevqa joldaǵan jyly lebizderi úshin alǵysyn bildirdi. Ministr qatysýshylardy AEHA tómen baiytylǵan ýran bankiniń ashylý kezinde jariialanǵan Elbasynyń bastamalardan habardar etti, sondai-aq halyqaralyq qarýsyzdaný jáne taratpaýdyń negizgi aspektileri boiynsha Qazaqstannyń ustanymyna egjei-tegjeili toqtaldy.
