Qazaqstannyń birinshi, álemniń 49-raketkasy Aleksandr Býblik Astana Open ATP 250 týrniriniń ekinshi ainalymyna shyǵa almady, dep habarlaidy "Ult aqparat".
Dodanyń 6-raketkasy bolyp tirkelgen A.Býblik alǵashqy ainalymda reitingide 209-orynda turǵan amerikalyq Makkenzi Makdonaldpen sheberlik baiqasty.
Bul tennisshilerdiń osy aidaǵy ekinshi kezdesýi edi. Budan buryn biyl 23-ke tolǵan A.Býblik Sankt-Peterbýrg jarysynyń birinshi ainalymynda ózinen eki jas úlken qarsylasyn 2:6, 7:6 (7:2), 6:4 esebimen utqan-dy.
Bul joly birinshi partiiada qazaqstandyq tennisshi breik jasap, 2:1 esebimen alǵa shyqqanymen, sol qarqynyn jalǵastyra almai, ese jiberdi – 3:6.
Ekinshi set amerikalyq sportshynyń aiqyn basymdylyǵymen ótti – 6:2.
Match barysynda sylbyr qimyldaǵan A.Býblik qatelikke jii boi aldyrdy. Sóitip úmitti aqtamady.
Báseke 1 saǵat 12 minýtqa sozyldy.
Amerikalyq tennisshi shirek finalǵa shyǵý úshin jarysqa arnaiy shaqyrtý arqyly qosylǵan, reitingide 103-satydaǵy italiialyq Andreas Seppimen talasady. Ol alǵashqy ainalymda reseilik Aslan Karatsevti 6:3, 1:6, 6:3 esebimen joldan taidyrdy.
Osylaisha óz elimizde alǵash ret ótip jatqan ATP 250 týrnirinde jekelei synda Qazaqstannan Mihail Kýkýshkin ǵana qaldy.
