21 qarashadan bastap Qazaqstanda balalardy esepke alý jáne mekteptegi býllingtiń aldyn alý tártibi ózgeredi. Endi 18 jasqa deiingi balalar týraly málimetter biryńǵai derekqorǵa jinaqtalyp, sabaqqa sebepsiz jii qatyspaityn oqýshylar da arnaiy esepke alynady. Sonymen qatar mektepter býlling týraly aqparatty tirkeý jáne oǵan den qoiý boiynsha jańa talaptardy oryndaýǵa mindetteledi, dep habarlaidy ult.kz.
Almaty qalasy Balalardyń quqyqtaryn qorǵaý basqarmasynyń málimetinshe, biryńǵai bazaǵa mektepke deiingi jáne mektep jasyndaǵy balalar, bilimmen qamtylmaǵandar, sondai-aq sabaqtan dáleldi sebepsiz júieli túrde qalatyn oqýshylar týraly aqparat engiziledi.
Jańa tártip boiynsha, sabaqqa qatyspaý derekteri ai saiyn politsiia organdarymen salystyrylyp, tekseriledi. Jinaqtalǵan málimetter Ulttyq bilim berý derekqoryna ár aidyń 10-ynan keshiktirilmei engizilýi tiis. Bul shara bilim berý uiymdarynan tys qalǵan nemese oqý protsesine turaqty qatyspaityn balalardy der kezinde anyqtaýǵa baǵyttalǵan.
Ózgerister mekteptegi býllingpen kúres tártibin de qamtidy. Endi bilim berýdi basqarý organdary býlling týraly túsken aqparatty bir jumys kúni ishinde tirkeýge mindetti. Buǵan qosa, mektepter balalarǵa psihologiialyq qoldaý kórsetýdi uiymdastyryp, olardyń qaýipsiz bilim alý ortasyn qamtamasyz etýi kerek.
Aita keteiik, buǵan deiin Qazaqstanda balalarǵa qatysty zorlyq-zombylyq, qatygezdik jáne býlling jaǵdailaryna den qoiýdyń biryńǵai vedomstvoaralyq algoritmi bekitilgen bolatyn.
Oǵan sáikes, balanyń quqyqtary buzylýy múmkin ekeni týraly aqparat ýákiletti organdarǵa dereý joldanýy qajet. Al bala quqyqtaryn qorǵaý jónindegi organǵa habarlama bir saǵat ishinde jetkizilýi tiis.
Jańa talaptardyń negizgi maqsaty – balanyń bilim alý quqyǵynyń buzylýyna jol bermeý, sabaqtan sebepsiz qalý jaǵdailaryn baqylaýǵa alý jáne mekteptegi qysym men zorlyq-zombylyq derekterine jedel áreket etý.