Almaty oblysynda apatqa ushyraǵan Sý-27 áskeri ushaǵynyń ushqyshy otbasyna oraldy. 800 metr biiktikten parashiýtpen sekirip ketken Ádilbek Ysqaqov din aman. Al qos birdei qozǵaltqyshy isten shyqqan ushaq adam aiaǵy baspaityn jazyqqa baryp qulapty. Sondyqtan apat ornyna arnaiy komissiia tikushaqpen jetkizilip, tergeýdi bastady. Endi osy oqiǵadan keiin elimizdegi barlyq Sý-27 ushaqtary tekserilip jatyr. Bul jaiynda KTK telearnasy habarlady.
Bir ajaldan aman qalǵan Ádilbek Ysqaqovtyń aitýynsha, kezekti oqý-jattyǵý barysynda tizgindegen Sý-27 kókte kenetten qozǵaltqyshy isten shyǵypty. Sondyqtan ol eń aldymen áýe tehnikasyn qaýipsiz jerge qulatýdy kózdegen.
"Túngi oqý-jattyǵý jumystaryn aiaqtap, Taldyqorǵan aerodromyna qonýǵa bet alǵanda ushaqtan aqaý shyqty. Kóp oilanbastan ainalasy 30-40 sekýnd ishinde áýe tehnikasyn aýyl-aimaqtan alshaqtaý jerge baǵyttap, ózim sekirip kettim. Óitkeni eń aldymen jerdegi halyqty oiladym. Olarǵa qaiǵy ákelgim kelmedi", - deidi 21751 áskeri bólimshesiniń ushqyshy Ádilbek Ysqaqov.
Ádilbek Ysqaqovtyń atqysh ushaǵy adam aiaǵy baspaityn jazyqqa baryp qulaǵan. Ushqysh birden basshylarymen bailanys apat ornyn aityp beripti. Al ózine 15 minýttan keiin kómek kelgen. Birden áskeri gospitalǵa jetkizilgen ushqyshtyń esh jeri zaqymdanbady.
"Naýqastyń shaǵymdary bolǵan joq. Soǵan qaramastan tekserýlerdiń bárin jasadyq. Rentgen, ÝZI, laboratoriialyq tekserýlerden ótkizdik. Barlyq mamandarmen konsiliým quryp, kórip shyqtyq", - dedi Taldyqorǵan áskeri gospitaliniń bastyǵy Asqar Kólbaev.
Apatqa ushyraǵan áýe kemesi baǵytyn ózgertpegende, ol Eńbek, Moinaq aýyldarynyń ústine qulaityn edi deidi mamandar. Sondyqtan shuǵyl sheshim qabyldai bilgen ushqyshtyń áreketin áriptesteri erlikke balap otyr. Degenmen, elimizdiń Bas áskeri prokýratýrasy osy oqiǵa boiynsha qylmystyq is qozǵap, tergeý amaldaryn bastap ketti.
"Osy oqiǵa boiynsha Bas áskeri prokýratýramen QR QK 464 baby ol "ushý nemese oǵan daiyndaý qaǵidalaryn buzý" baby boiynsha qylmystyq is qozǵaldy", - dedi QR Bas áskeri prokýratýrasynyń resmi ókili Jeńis Temekov. (Derekkóz: KTK)
Al osyǵan deiin burynǵy qorǵanys ministri, Parlament Senatynyń depýtaty Muhtar Altynbaev Taldyqorǵan mańynda áýe apatyna ushyraǵan qazaqstandyq Sý-27 ushaǵynyń qulaýynyń sebepterin ataǵan bolatyn.
Eske sala keteiik, keshe, 21 jeltoqsanda Sý-27 joiǵysh ushaǵy apatqa ushyraǵan bolatyn. "Búgin, 21 jeltoqsanda tún jaǵdaiynda oqý-jattyǵý ushýyn oryndaý kezinde aviatsiialyq oqiǵanyń saldarynan Sý-27 ushaǵy apatqa ushyrady. Ushqysh maior Á.Ysqaqov bar múmkindigin saldy jáne ushaqty eldi mekennen alshaq alyp ketip, katapýltalandy", - delingen edi ministrliktiń resmi pikirinde.
Eske salaiyq, dál osyndai apat buǵan deiin de bolǵan. 2014 jyly Taldyqorǵan qalasynyń mańynda taǵy bir Sý-27 qulaǵan edi. Ol kezde de tizgindegi Erlan Naýanov pen Denis Gorbýnov ushaqty eldi mekennen alystaý jerge alyp ketemin dep, ózderi ajal qushqan.
.jpeg)