Belgili kásipker Baqtiiar Qudaibergen otbasyly bola tura ózge qyzǵa ǵashyq bolyp, ekinshi áiel alýdy oilaǵanyn jasyrmady. Ol ómirindegi osy bir qiyn kezeńdi eske alyp, ákesiniń aitqan aqyly týraly sóz qozǵady, dep habarlaidy ult.kz.
Kásipker bul týraly jýrnalist Aman Tasyǵannyń “Talk Like” baǵdarlamasynda aitty. Onyń sózinshe, áieli men balalary bola tura, basqa qyzǵa kóńili aýyp, tipti onymen shańyraq kóterýge bel býǵan. Sol kezde ol bul sheshimin ákesine jetkizgen.
“Ákeme habarlastym. ‘Áke, men bir qyzǵa ǵashyq bolyp qaldym. Biraq áielim, bala-shaǵam bar. Resmi túrde ekinshi áiel alamyn’, – dedim. Sol kezde ákem ‘Balam, seniń qaryndasyń bar. Onyń kúieýi kelip, ekinshi áiel alamyn dese, men qalai kónemin?’ – dedi. Men ‘Joq, shydai almai jatyrmyn, álim kelmei jatyr’ dep aittym”, – dep eske aldy kásipker.
Alaida ákesi ulynyń bul sheshimin quptamaǵan. Kerisinshe, asyǵys qadam jasamaýǵa shaqyryp, ýaqyt óte seziminiń basylatynyn túsindirýge tyrysqan.
“Ákem ‘Balam, bylai qylaiyq. Men bul áńgimeni estigen joqpyn, sen de aitqan joqsyń. Ýaqyt óte toqtaisyń’, – dedi. Men oǵan toqtai almaitynymdy aittym. Sonda ákem ‘Men de jas boldym, men de qydyrdym. Biraq ár nárseniń óz ýaqyty bar. Seniń qańǵyp, basqa jaqta júrgenińdi bilemin ǵoi. Men seniń bir kúni toqtaǵanyńdy kútip júrmin’, – dedi”, – dep kásipker kózine jas aldy.
Baqtiiar Qudaibergen bul oqiǵany ómirindegi eń aýyr kezeńderdiń biri dep sipattady. Onyń aitýynsha, sol ýaqytta sezimine erik berip, otbasylyq ómirine áser etýi múmkin sheshim qabyldaýǵa shaq qalǵan.
