Almatydaǵy «Pedagogter akademiiasyna» qatysty jaǵdaiǵa bailanysty 268 balanyń oqýyn qalai jalǵastyratyny túsindirildi, dep habarlaidy ult.kz.
Almaty qalasy Bilim basqarmasynyń málimetinshe, jańa oqý jylyna atalǵan uiymmen memlekettik bilim berý tapsyrysyn ornalastyrý týraly kelisimshart jasalmaǵan. Qazir qujattar men oqý jaǵdaiyn belgilengen talaptarǵa sáikestendirý jumystary júrgizilip jatyr.
Sonymen birge mektepti jabý týraly sheshim qabyldanbaǵan.
12 qazanda №15 mektep-internattyń bazasynda №7 arnaiy mektep-internattyń filialy jumysyn bastady. Onda balalar tegin bilim alyp, túzetý-damytý kómegin ala alady.
Budan bólek, Almatyda arnaiy bilim berý uiymdarynyń jelisin keńeitý josparlanǵan. Atap aitqanda, burynǵy №164 jáne №41 mektepterdiń ǵimarattarynda jańa arnaiy mektep-internat ashý kózdelip otyr.
Bilim basqarmasynyń habarlaýynsha, ár balanyń oqýyn jalǵastyrý máselesi onyń jeke qajettiligi men ata-anasynyń pikiri eskerile otyryp, jeke qarastyrylady.
