Soltústik Kiprdiń Nikosiia qalasynda 22 jastaǵy Qazaqstan azamatyna jasalǵan pyshaq shabýyly qoǵamnyń alańdaýshylyǵyn týǵyzdy. Oqiǵa 3 tamyz kúni jergilikti ýaqytpen saǵat 11:45 shamasynda Metropol Market sýpermarketinde bolǵan, dep habarlaidy ult.kz.
Aldyn ala málimet boiynsha, belgisiz er adam qyzǵa birneshe ret pyshaq suqqan. Shabýyldan keiin kúdikti sol pyshaqpen ózin de jaralaǵan. Ekeýi de jedel túrde doktor Býrhan Nalbantoglý atyndaǵy memlekettik aýrýhanaǵa jetkizilip, dárigerlerdiń baqylaýyna alynǵan. Oqiǵanyń naqty sebebi ázirge belgisiz, politsiia tergeý júrgizip jatyr.
Soltústik Kiprdiń jergilikti BAQ-tarynyń habarlaýynsha, shabýyl jasaǵan adam zardap shekken qyzdyń burynǵy jigiti bolýy múmkin. Alaida quqyq qorǵaý organdary bul aqparatty resmi túrde áli rastaǵan joq.
Aldyn ala málimetke sáikes, zardap shekken qazaqstandyqtyń esimi – Jánerke Ábdirazaqova. Ol 22 jasta. Dárigerler onyń ómirin saqtap qalý úshin kúresip jatyr.
Qazaqstan Syrtqy ister ministrligi oqiǵaǵa qatysty mán-jaidy anyqtap jatqanyn málimdedi. Vedomstvo tekserý aiaqtalǵannan keiin qosymsha aqparat beretinin habarlady.
