Foto: pixabay/vidhyarthidarpan
Shymkentte bilim berý salasyna bólingen biýdjet qarajatyn iri kólemde jymqyrý deregi anyqtaldy. Qarjylyq monitoring agenttiginiń málimetinshe, is boiynsha qylmystyq shema sotqa joldanǵan6 dep habarlaidy Ult.kz.
Tergeý derekterine sáikes, 2018–2023 jyldar aralyǵynda «Ońtústik Qazaqstan joǵary meditsinalyq kolledji» JShS jáne «Ońtústik Qazaqstan gýmanitarlyq-qarjy kolledji» JShS bazasynda jalǵan oqytý júiesi uiymdastyrylǵan.
Shemaǵa kolledj basshylary, býhgalterler jáne ózge de tulǵalar qatysqany belgili boldy. Azamattar oqý oryndaryna formaldy túrde qabyldanǵanymen, is júzinde bilim almaǵan. Sonyń nátijesinde memleket esebinen bólinetin qarjy zańsyz alynǵan.
Sonymen qatar jalǵan buiryqtar rásimdelip, elektrondyq tsifrlyq qoltańba arqyly qujattar bekitilgen, al oryndalǵan jumystar týraly jalǵan aktiler jasalǵan. Keibir stýdentter aqyly bólimnen memleket esebindegi bilim alýshylar qataryna zańsyz aýystyrylǵan.
«Ońtústik Qazaqstan gýmanitarlyq-qarjy kolledji» is júzinde jumys istemei, tek biýdjet qarajatyn alý úshin paidalanylǵan.
Memleketke keltirilgen jalpy zalal 1,3 mlrd teńgeden asqan.
Tergeý barysynda shema uiymdastyrýshysynyń buǵan deiin de sottalǵany, tipti qamaýda otyryp qylmystyq áreketterdi basqarǵany anyqtaldy. Kúdiktiler 65 mln teńge kólemindegi zalaldy erikti túrde ótegen.
Sot sanktsiiasymen múlikterge, sonyń ishinde Dýbaidaǵy páterge, birneshe turǵyn úi men avtokólikterge tyiym salyndy. Eki kúdikti qamaýǵa alynsa, úsh adamǵa qatysty eshqaida ketpeý týraly bultartpaý sharasy qoldanylǵan.
Qylmystyq is sot qaraýyna jiberildi.
