Jambyl oblysynda 16 jylqyny urlap, onyń jeteýin soiyp, etin satyp jibergen 44 jastaǵy er adam ustaldy. Keltirilgen shyǵyn kólemi 24 million teńgege baǵalanyp otyr, dep habarlaidy ult.kz.
Oqiǵa Turar Rysqulov aýdanyndaǵy jaiylymdardyń birinde bolǵan. Tergeý málimetinshe, kúdikti qaraýsyz jaiylyp júrgen jylqylardy baiqap, olardy qoldy etýdi uiǵarǵan. Ol óz atyna minip, 16 jylqyny úiirimen birge aidap áketken.
Keiin urlanǵan maldyń jeteýin soiyp, etin satyp jibergeni anyqtaldy. Osylaisha, mal iesine 24 million teńge kóleminde materialdyq shyǵyn kelgen.
Quqyq qorǵaý organdary kúdiktini ustap, ýaqytsha ustaý izoliatoryna qamady.
Qazir asa iri mólsherdegi mal urlyǵy deregi boiynsha sotqa deiingi tergeý amaldary júrgizilip jatyr.