Qaraǵandy oblysynda zańsyz shaian aýlap, ony iri kólemde satýmen ainalysqan uiymdasqan toptyń áreketi áshkerelendi. Politseiler kúdiktilerden jalpy salmaǵy 2,5 tonnadan asatyn shaian tárkilegen. Aldyn ala esep boiynsha, memleketke keltirilgen shyǵyn 20 million teńgege jýyqtaidy, dep habarlaidy ult.kz.
Polisia.kz málimetinshe, zańsyz kásip Priozersk qalasynda uiymdastyrylǵan. Quqyq qorǵaý organdarynyń málimetinshe, 23 pen 50 jas aralyǵyndaǵy segiz adamnan turatyn top shaiandardy zańsyz aýlap, asa iri mólsherde satýmen ainalysqan degen kúdikke ilindi.
Jedel-izdestirý jáne tergeý sharalary barysynda tártip saqshylary 2 557 keli shaiandy tárkiledi. Sonymen qatar zattai dálel retinde 115 pallet, zańsyz aýlanǵan ónimdi tasymaldaýǵa paidalanyldy degen boljam bar júk kóligi men «GAZel» avtokóligi alyndy.
Aldyn ala málimet boiynsha, kúdiktilerdiń zańsyz áreketinen memleketke shamamen 20 million teńge kóleminde zalal kelgen.
Atalǵan derek boiynsha qylmystyq is qozǵaldy. Ustalǵan segiz adamnyń ekeýi ýaqytsha ustaý izoliatoryna qamaldy. Qalǵandaryna qatysty protsessýaldyq áreketter jalǵasyp jatyr.
Qazir tergeýshiler zańsyz kásiptiń barlyq mán-jaiyn anyqtap, oǵan qatysy bolýy múmkin ózge de tulǵalardy izdestirip jatyr.