QR Parlamenti Senatynyń depýtaty Marat Taǵymov óz áriptesteri atynan el Premer-Ministri Baqytjan Saǵyntaevqa depýtattyq saýal joldady, dep habarlaidy QazAqparat.
«Qurmetti Baqytjan Ábdiruly! Búgingi kúni Qazaqstannyń birneshe óńirin sý apaty alyp otyr. Resmi aqparatqa sáikes, elimizdiń ortalyq jáne soltústik óńirlerinde sý tasqyny 11 sáýirden bastap beleń aldy. Aqmola, Aqtóbe, Qaraǵandy, Qostanai, Pavlodar, Soltústik Qazaqstan oblystarynyń birqatar eldi mekenderi men joldardy erigen qar sýy shaiyp kete jazdady. Otandastarymyz úiinen, bar jiǵan-tergeninen aiyrylyp, bes myńnan astam úi qojaiyndyqtary qular aldynda, myńdaǵan qazaqstandyq osyndai qiyn jaǵdaiǵa dýshar bolyp otyr. Jergilikti atqarýshy bilik pen quzyrly memlekettik organdar jyl basynan bastap depýtattar aldynda tasqyn sýdyń aldyn-alý sharalaryna qyrýar qarjy bólýdi qorǵaidy. Alaida, jyl saiyn osyndai jaǵdai qaitalanyp, sý tasqyny biz úshin úirenshikti tótenshe jaǵdaiǵa ainaldy», - dep atap ótti senator.
Onyń aitýynsha, tótenshe jaǵdai bastalǵannan beri Aqmola oblysyna qarasty Atbasar qalasynda 454 úi sýǵa ketip, 1379 adam kóshirilgen, Soltústik Qazaqstan oblysynda 400-den astam úi sý astynda qalý qaterinde, Aqtóbe oblysynda 500-den astam turǵyn úi sý astynda qalǵan. «Al quzyrly memlekettik organdar bolsa, osyndai jaǵdai Aqmola, Aqtóbe, Qaraǵandy, Qostanai, Jambyl oblystaryndaǵy sý qoimalaryna tasqyn jáne erigen qar sýy tolassyz aǵyp kelýine bailanysty aǵyzatyn sýdyń mólsherin sál qosý qajet bolýy sebebinen eldi mekender men avtojoldardy sý basty dep qoldaryn qýsyryp otyr. Endigi bizdiń saýalymyz: nelikten osy kúnge deiin quzyrly organdardyń jaýapty qyzmetkerleri óziniń kásibi sheńberiniń tarlyǵyn tabiǵi ataklizmderimen jasyryp keledi? Olardyń jaýap beretin kúni kele me? Ádilettik úshin atap ketýimiz de jón, búgingi tańda tótenshe jaǵdai komitetiniń azamattary óz boryshyn adal oryndap keledi. Biraq zardap shekken turǵyndardyń kóptegen million shyǵynyn kim óteidi? El aman, jurt tynyshta bundai jaǵdaiǵa jergilikti biliktegi azamattar qalai jol bergen?», - dedi Taǵymov.
Senatordyń aitýynsha, osy rette otandastarymyzdy tolǵandyryp otyrǵan eki másele týyndap otyr.
«Birinshiden, qiyn jaǵdaiǵa dýshar bolǵan jerlesterimizge Úkimet tarapynan qandai járdem kórsetiledi? Ekinshiden, bundai jaǵdai qaita oryn almas úshin Úkimet qandai sharalar qolǵa almaq? Qurmetti Baqytjan Ábdiruly, joǵaryda baiandalǵandy jáne qozǵalǵan máselelerdiń mańyzdylyǵyn eskere otyryp, osy saýal boiynsha tiisti sharalardy qabyldaýyńyzdy suraimyz», - dep atap ótti ol.
