Aqmola oblysynda zańsyz tasymaldanǵan 31 qaraǵai anyqtaldy. Petropavl tasjolynda patrýldik politsiia qyzmetkerleri ruqsat qujattarynsyz aǵash tiegen GAZel kóligin toqtatqan. Aldyn ala esep boiynsha, memleketke keltirilgen zalal kólemi 1,6 million teńgege baǵalanyp otyr, dep habarlaidy ult.kz.
Polisia.kz málimetinshe, politsiia qyzmetkerleri kólikti tekserý kezinde onyń júk bóliginde 31 qaraǵai baryn anyqtaǵan. Tekserý nátijesinde aǵashtardyń Bulandy aýdanyna qarasty aýyldyq ákimdikterdiń birine tiesili ekeni belgili boldy.
Kólik ishinde bolǵan 38 jastaǵy er adam aǵashtardy elordaǵa jetkizýdi josparlaǵan. Alaida onyń qaraǵailardy tasymaldaýǵa zańdy quqyǵyn rastaityn eshqandai qujaty bolmaǵan. Osyǵan bailanysty júrgizýshi kóligimen birge politsiia bólimine jetkizildi.
Atalǵan derek boiynsha urlyq faktisimen qylmystyq is qozǵalyp, sotqa deiingi tergeý bastaldy. Qazir oqiǵanyń barlyq mán-jaiy anyqtalyp jatyr.
Politsiia ókilderi aǵashtardy zańsyz kesý men iemdený qorshaǵan ortaǵa ǵana emes, memleket múlkine de eleýli ziian keltiretinin eskertedi. Orman resýrstaryn satyp alý, tasymaldaý jáne satý mindetti túrde zań talaptaryna sáikes júzege asyrylýy tiis. Sondyqtan aǵash ónimderin tasymaldaý kezinde tiisti ruqsat qujattarynyń bolýyna nazar aýdarý qajet.
Quqyq qorǵaý organdary turǵyndardy tabiǵi bailyqty qorǵaýǵa shaqyryp, aǵashtardy zańsyz kesý nemese urlaý derekteri týraly 102 nómirine habarlaýdy suraidy.
