Almatyda Helloýin merekesin atap ótýge jinalǵan jastardyń politsiia bólimshesine jetkizilgeni týraly aqparat áleýmettik jelide tarady. Oqiǵaǵa qatysty qalalyq Politsiia departamenti túsinikteme berip, túngi reid kezinde zańdy ókilderiniń erip júrýinsiz júrgen 28 jasóspirim anyqtalǵanyn málimdedi, dep habarlaidy ult.kz.
Egov.press Telegram arnasynyń habarlaýynsha, Helloýin merekesine orai túrli keiipkerlerdiń kostiýmin kigen jastar qala kóshelerine shyqqan. Alaida kóp uzamai olardyń birqataryn politsiia qyzmetkerleri ustap áketkeni týraly video jariialandy.
Jazbada Jibek joly kóshesindegi politsiia bólimshesiniń mańyna jinalǵan adamdardy kórýge bolady. Bul jaǵdai áleýmettik jeli qoldanýshylary arasynda túrli pikir týǵyzdy.
Almaty qalalyq Politsiia departamentiniń málimetinshe, Almaly aýdanynda qoǵamdyq tártip pen turǵyndardyń qaýipsizdigin qamtamasyz etý maqsatynda profilaktikalyq is-sharalar júrgizilgen.
Vedomstvo ókilderi politsiianyń merekelik sharalarǵa nemese turǵyndardyń bos ýaqytyn uiymdastyrýyna kedergi keltirmeitinin atap ótti. Alaida qoǵamdyq oryndarda qaýipsizdikti saqtaý jáne yqtimal quqyq buzýshylyqtardyń aldyn alý – politsiianyń negizgi mindetteriniń biri.
Tártip saqshylarynyń aitýynsha, reid barysynda «Arbat» jaiaý júrginshiler aimaǵynda túngi ýaqytta zańdy ókilderiniń erip júrýinsiz júrgen 28 jasóspirim anyqtalǵan. Olardyń ata-analaryna qatysty ákimshilik materialdar toltyrylǵan.
Politsiia kámeletke tolmaǵandardyń saǵat 23:00-den tańǵy 06:00-ge deiin zańdy ókilderinsiz turǵyn úiden tys jerde júrýine zańmen tyiym salynǵanyn eske saldy.
Vedomstvo ata-analardy balalarynyń qaida júrgenine, kimdermen aralasatynyna, ásirese keshki jáne túngi ýaqyttaǵy qaýipsizdigine jaýapkershilikpen qaraýǵa shaqyrdy.
«Balalardyń qaýipsizdigi – barshamyzǵa ortaq jaýapkershilik», – dep atap ótti politsiia ókilderi.
Aita keteiik, buǵan deiin áleýmettik jelide Astanada politsiia qyzmetkerleriniń kámeletke tolmaǵan balalardy politsiia bólimshesine jetkizgen sáti túsirilgen video taraǵan edi.
Astana qalalyq Politsiia departamentiniń málimetinshe, 17 tamyzǵa qaraǵan túni Saryarqa aýdanynda eresekterdiń erip júrýinsiz júrgen 10 jáne 12 jastaǵy eki bala anyqtalǵan. Olardyń qaýipsizdigin qamtamasyz etý úshin politseiler balalardyń jeke basyn anyqtap, politsiia bólimshesine jetkizgen jáne zańdy ókilderine tapsyrǵan.
