Semeide toǵyz jyl buryn joǵalǵan bir jarym jasar sábi áli kúnge deiin tabylmady. Kishkentai Aishanyń týystary isti qaita tergep, anasyn jazalaýdy talap etedi. Sebebi, 2016 jyly kúdikke ilingen áiel týǵan qyzyn ózenge aǵyzyp jibergenin aitqan eken. Biraq Ertisti sharlap shyqqan jaqyndary denesin tappaǵan soń, qazir qyzdyń ne óli, ne tiri ekenin bilmei otyr, dep habarlaidy ult.kz.
Ákesiniń týystary Aishany sharq uryp izdep júrgeninderine toǵyz jyldan asty. Olardyń aitýynsha, otbasylyq janjaldan keiin kelinderi bir jarym jastaǵy qyzdy alyp, túnde Ertis ózenine aǵyzyp jibergen. Sodan keiin shyrt uiqyda jatqan kúieýin oiatyp, sumdyq qadamǵa barǵanyn moiyndady deidi.
“Baýyrymdy oiatqan osylai-osylai men balany Ertiske aǵyzyp jiberdim degen. Sodan keiin baýyrym Ertiske baryp izdegen balany, sonda tapqany tek kúrteshesi. Biz balany satyp jiberdi ne týystaryna, álde basqa bireýge bere saldy ma dep oilaimyz”, – dedi Aishanyń ápkesi Zarina Serikbolsyn.
“Qandai bolsa da árkim óz jazasyn alý kerek qoi. Adamnyń aldynda da, týystardyń aldynda da keshirim surap moiynda dedim. Ol bala joq qoi dep bárin suraq belgisimen qaldyrady. Jaýaptyń bárin suraq belgisimen qaldyryp tur”, – dep qosty Maqpal Matkasimova.
Jalǵyz qyzyn taba almaǵan ákesi aýyr kúizelisten keiin óz-ózine qol jumsap, kóz jumǵan eken. Al kishkentai búldirshinniń anasy basqa otbasyn qurǵan. Alǵashynda kúdikke ilingen 36 jastaǵy kelinshektiń bostandyqta júrgenine qaiyn jurty narazy.
“Kelin balanyń qaida ekenin, shyndyǵyn aitpaidy. Sodan beri mine toǵyz jyl ýaqyt ótti, balam bul dúnieden ótip ketti. Endi balanyń arýaǵy túske kirip myna jaqta balam joq deidi. Balany ana jaqtan izdeńder, bu jaqta balam joq deidi. Endi balanyń arýaǵy razy bolsyn dep nemerege qaita toǵyz jyldan keiin isin qaita qozǵap otyrmyz”, – dedi Aishanyń atasy Nurlan Serikbolsyn.
Atasy nemeresiniń tiri ekenine senimdi. Sondyqtan isti qaita tergep, kináli adamdy jazalaýdy talap etedi. Al politsiia Aishanyń anasy kýáger retinde jaýap bergenin aitady. Qylmystyq quram bolmaǵandyqtan tergeý toqtatylǵan. Alaida turǵyndardyń shaǵymynan keiin muraǵatqa ketken is toǵyz jyldan soń qaita qozǵalypty.
