سەمەيدە توعىز جىل بۇرىن جوعالعان بٸر جارىم جاسار سەبي ەلٸ كٷنگە دەيٸن تابىلمادى. كٸشكەنتاي ايشانىڭ تۋىستارى ٸستٸ قايتا تەرگەپ, اناسىن جازالاۋدى تالاپ ەتەدٸ. سەبەبٸ, 2016 جىلى كٷدٸككە ٸلٸنگەن ەيەل تۋعان قىزىن ٶزەنگە اعىزىپ جٸبەرگەنٸن ايتقان ەكەن. بٸراق ەرتٸستٸ شارلاپ شىققان جاقىندارى دەنەسٸن تاپپاعان سوڭ, قازٸر قىزدىڭ نە ٶلٸ, نە تٸرٸ ەكەنٸن بٸلمەي وتىر, دەپ حابارلايدى ult.kz.
ەكەسٸنٸڭ تۋىستارى ايشانى شارق ۇرىپ ٸزدەپ جٷرگەنٸندەرٸنە توعىز جىلدان استى. ولاردىڭ ايتۋىنشا, وتباسىلىق جانجالدان كەيٸن كەلٸندەرٸ بٸر جارىم جاستاعى قىزدى الىپ, تٷندە ەرتٸس ٶزەنٸنە اعىزىپ جٸبەرگەن. سودان كەيٸن شىرت ۇيقىدا جاتقان كٷيەۋٸن وياتىپ, سۇمدىق قادامعا بارعانىن مويىندادى دەيدٸ.
“باۋىرىمدى وياتقان وسىلاي-وسىلاي مەن بالانى ەرتٸسكە اعىزىپ جٸبەردٸم دەگەن. سودان كەيٸن باۋىرىم ەرتٸسكە بارىپ ٸزدەگەن بالانى, سوندا تاپقانى تەك كٷرتەشەسٸ. بٸز بالانى ساتىپ جٸبەردٸ نە تۋىستارىنا, ەلدە باسقا بٸرەۋگە بەرە سالدى ما دەپ ويلايمىز”, – دەدٸ ايشانىڭ ەپكەسٸ زارينا سەرٸكبولسىن.
“قانداي بولسا دا ەركٸم ٶز جازاسىن الۋ كەرەك قوي. ادامنىڭ الدىندا دا, تۋىستاردىڭ الدىندا دا كەشٸرٸم سۇراپ مويىندا دەدٸم. ول بالا جوق قوي دەپ بەرٸن سۇراق بەلگٸسٸمەن قالدىرادى. جاۋاپتىڭ بەرٸن سۇراق بەلگٸسٸمەن قالدىرىپ تۇر”, – دەپ قوستى ماقپال ماتكاسيموۆا.
جالعىز قىزىن تابا الماعان ەكەسٸ اۋىر كٷيزەلٸستەن كەيٸن ٶز-ٶزٸنە قول جۇمساپ, كٶز جۇمعان ەكەن. ال كٸشكەنتاي بٷلدٸرشٸننٸڭ اناسى باسقا وتباسىن قۇرعان. العاشىندا كٷدٸككە ٸلٸنگەن 36 جاستاعى كەلٸنشەكتٸڭ بوستاندىقتا جٷرگەنٸنە قايىن جۇرتى نارازى.
“كەلٸن بالانىڭ قايدا ەكەنٸن, شىندىعىن ايتپايدى. سودان بەرٸ مٸنە توعىز جىل ۋاقىت ٶتتٸ, بالام بۇل دٷنيەدەن ٶتٸپ كەتتٸ. ەندٸ بالانىڭ ارۋاعى تٷسكە كٸرٸپ مىنا جاقتا بالام جوق دەيدٸ. بالانى انا جاقتان ٸزدەڭدەر, بۇ جاقتا بالام جوق دەيدٸ. ەندٸ بالانىڭ ارۋاعى رازى بولسىن دەپ نەمەرەگە قايتا توعىز جىلدان كەيٸن ٸسٸن قايتا قوزعاپ وتىرمىز”, – دەدٸ ايشانىڭ اتاسى نۇرلان سەرٸكبولسىن.
اتاسى نەمەرەسٸنٸڭ تٸرٸ ەكەنٸنە سەنٸمدٸ. سوندىقتان ٸستٸ قايتا تەرگەپ, كٸنەلٸ ادامدى جازالاۋدى تالاپ ەتەدٸ. ال پوليتسييا ايشانىڭ اناسى كۋەگەر رەتٸندە جاۋاپ بەرگەنٸن ايتادى. قىلمىستىق قۇرام بولماعاندىقتان تەرگەۋ توقتاتىلعان. الايدا تۇرعىنداردىڭ شاعىمىنان كەيٸن مۇراعاتقا كەتكەن ٸس توعىز جىلدان سوڭ قايتا قوزعالىپتى.
