Jyl basynan beri Qazaqstannan janar-jaǵarmai materialdaryn zańsyz shyǵarýdyń 712 áreketiniń joly kesildi, dep habarlaidy ult.kz.
Qarjylyq monitoring agenttigi habarlaýynsha, munai ónimderiniń zańsyz ainalymy men kontrabandasy derekteri boiynsha 8 sotqa deiingi tergep-tekserý bastalǵan.
Máselen, Mańǵystaý oblysynda 2022 jyldan beri esepke alynbaǵan 28,5 myń tonnadan astam munaidy óńdegen zańsyz shaǵyn munai óńdeý zaýytynyń qyzmeti áshkerelendi. Tergeý málimetine sáikes, óndirilgen ónim mazýt retinde rásimdelip, keiin shetelge shyǵarylyp otyrǵan.
Al Túrkistan oblysynda memlekettik shekara astynan arnaiy qazylǵan tonnel arqyly Ózbekstanǵa benzin kontrabandasyn uiymdastyrǵan transulttyq qylmystyq toptyń áreketi toqtatyldy. Sot sheshimimen atalǵan iske qatysy bar tulǵalar uzaq merzimge bas bostandyǵynan aiyryldy.
Sonymen qatar, Qyrǵyzstanǵa AI-92 markaly benzindi zańsyz tasymaldaýmen ainalysqan qylmystyq topqa qatysty tergeý aiaqtaldy. Tergeý barysynda zańsyz shyǵarylǵan janarmai kólemi 190 myń tonnadan asyp, onyń jalpy quny 37 milliard teńgeden joǵary bolǵany anyqtalǵan.
QMA málimetinshe, kezekti zańsyz tasymaldaý áreketi kezinde «Túrksib» stantsiiasynda shamamen 500 tonna benzin tielgen segiz temirjol tsisternasy ustaldy. Quny 138 million teńge bolatyn tárkilengen janarmai memleket kirisine ótkizildi.
