Qazaqstan Úkimetiniń basshysy Baqytjan Saǵyntaev Eýraziialyq úkimetaralyq keńestiń keńeitilgen otyrysynda qazaq-qyrǵyz jáne qazaq-resei shekarasyndaǵy ahýalǵa qatysty túsindirme berdi, dep habarlaidy Baq.kz aqparat agenttigi.
Qazaqstan premeri shekaradaǵy jumystardyń qyrǵyz tarapyna baǵyttalmaǵanyn aitty.
«Biz salyq úlesi boiynsha keletin ziian mólsherin azaityp, kontrabanda deńgeiin tómendetkimiz keledi. Qazaqstannyń budan basqa kózdep otyrǵan esh maqsaty joq. Bul odaqtaǵy basqa áriptesterimizge de qatysty» dep málimdedi Saǵyntaev.
«Biz Qazaqstan men Qyrǵyzstan arasyndaǵy jol kartasyn ázirlep jatyrmyz (48 tarmaqtan turady – agenttik). 43 tarmaq boiynsha bir mámilege kelip otyrmyz. Bizdiń qyzmetter olardy odan ári júzege asyrýmen ainalysady», - dedi Baqytjan Saǵyntaev.
Ol Qytaidan EAEO elderine taýar jetkizýge qatysty jaǵdaiǵa qysqasha sholý jasady.
«EEK málimetinshe, 2016 jyly EAEO elderiniń importy $201 milliard boldy. Sonymen qatar onyń edáýir kóp bóligi Qytaidyń úlesinde – 22,7 protsent. 2017 jyldyń 7 aiynda da osyndai jaǵdai qaitalandy», — dep atap ótti Qazaqstan premeri.
2014-2016 jyldary Qytaidan EAEO elderine import dinamikasynyń taldaýy: Qyrǵyz Respýblikasynan basqa barlyq elderde import tómendegeni baiqalyp otyr, onyń ishinde Qazaqstanǵa eki ese tómendegen.
«2014-2016 jyldar ishinde kedendik baj salyǵynyń túsý dinamikasynyń taldaýy da Qyrǵyzstannan basqa, odaqtyń barlyq elderi boiynsha túsim tómendegenin kórsetti. Bul tusta eń kóp joǵaltyp otyrǵan – Qazaqstan (18,9 paiyz)», - dedi ol.
Sondai-aq, Baqytjan Saǵyntaev jan basyna shaqqandaǵy halyqtyq tutyný taýarlaryn (kiim-keshek pen aiaq kiim) ákelý aqylǵa qonymsyz júrgiziletinin atap ótti.Máselen, Qazaqstanǵa qaraǵanda Qyrǵyzstanǵa kiim-keshek 65 ese, al Reseige qaraǵanda 43 ese kóp jetkiziledi.
Saǵyntaev Qazaqstan kedendik ákimshileýdiń jetkiliksiz ekenin 2016 jyly birneshe ret kótergenin eske saldy.
«Qyrǵyz Respýblikasy men Qazaqstan Respýblikasy qyzmetteri arasynda QHR-dan taýar tasymaldaý kezinde kúmándi deklaratsiialaýdyń jolyn kesý maqsatynda 2017 jylǵy 5 maýsymda birlesken qimyl jónindegi josparǵa qol qoiylǵan bolatyn. Alaida qyrǵyz tarapynyń josparlanǵan is-sharalardy oryndamaýynyń saldarynan tiisti áser bolǵan joq», - dedi Baqytjan Saǵyntaev.
Qyrǵyz Premer-ministri Sapar Isaqov qyrǵyz tarapy jeke málimdeme jasaitynyn atap ótti.
«Bizdiń de aitatyn jaittarymyz bar. Birneshe shaqyrymǵa sozylǵan kezek tek Qyrǵyzstan azamattarynyń ǵana emes, Qazaqstannyń da jáne úshinshi elder azamattarynyń da narazylyǵyn týǵyzýda», - dedi ol.
