Roza Baǵlanova atyndaǵy «Qazaqkontsert» memlekettik akademiialyq kontserttik uiymynyń sahnasynda Qazaqstannyń halyq ártisi Roza Rymbaevanyń shyǵarmashylyq jolynyń 50 jyldyǵyna arnalǵan mereitoilyq kesh uiymdastyryldy, dep habarlaidy ult.kz Mádeniet jáne aqparat ministrligine silteme jasap.
Kesh barysynda ánshiniń qazaq estradasynyń altyn qoryna engen tanymal týyndylary shyrqaldy. Kontserttiń shymyldyǵy Áli Oqapovtyń arnaiy osy keshke arnap jazǵan «Babalar amanaty» kompozitsiiasymen ashyldy. Áserli týyndyny Roza Rymbaevanyń ózi oryndady.
Mereitoilyq kesh aiasynda QR Premer-ministriniń orynbasary – Mádeniet jáne aqparat ministri Aida Balaevanyń quttyqtaý haty tabystaldy. Quttyqtaýda Roza Rymbaevanyń sahnadaǵy jarty ǵasyrlyq shyǵarmashylyq joly ólsheýsiz eńbek, tereń izdenis, biik talǵam, shynaiy talant pen ónerge degen adaldyqtyń jarqyn kórinisi ekeni atap ótildi.
Kontsertke otandyq estradanyń birneshe býyn ókilderi qatysty. Olardyń qatarynda ALEM, Qazybek Quraiysh, Qairat Baekenov, Batyrjan Tazabekov, Marjan Arapbaeva, Gúlsim Myrzabekova, Baian-Sulý jáne Iligai óner kórsetti. Sonymen qatar sahnaǵa ánshiniń uldary Áli Oqapov pen Mádi Rymbaev shyǵyp, nemeresi Zeiinmen birge «Jarasqan januia» ánin oryndap, kórermenniń ystyq yqylasyna bólendi.
Kesh barysynda Ilia Bashkatov bastaǵan mýzykanttar, QR Memlekettik kúzet qyzmetiniń Prezident orkestri jáne dirijer Darhan Rahymǵalidiń súiemeldeýimen tańdaýly týyndylar oryndaldy.
Shyǵarmashylyq kesh sońynda «Liýbov nastala», «Áliia» jáne «Erteńime senemin» ánderi shyrqalyp, Roza Rymbaevaǵa «Yqylas gúli» tabystaldy.
